Cun treis biatlets grischuns

DA GION NUTEGN STGIER / ANR

Sonda tgi vign scumainzan ad Osrblie (Slovachia) igls Campiunadis mundials da biatlon digls juniors. Dalla parteida èn tranter igls atlets er treis biatlets grischuns. Damai ena ferma delegaziun grischuna. Da curt ò Swiss Ski communitgia igls noms digls biatlets e dallas biatletas tgi peglian part agls Campiunadis mundials da biatlon digls juniors. Li on chels davent da sonda proxima anfignen igls 3 da favrer 2019 e chegl aint igl li da sport slovac Osrblie. Gio per la sagonda geda siva digl 2017 segna chel li per l’organisaziun dall’occurrenza mundiala da biatlon digls juniors e giuvenils. Per chel event internaziunal ò Swiss Ski selecziuno set atletas ed atlets. En fatg plaschevel è bagn tgi da chels sets mats e mattas dereivan gist seis digl cader da biatlon dalla Svizra orientala cun Lantsch scu li principal da trenadi.

350 atlets ed atletas da 36 naziuns

Campiunadis mundials da biatlon per juniors (IBU Junior Wold Championshisps) dattigl gio siva digl 1967. Igl 1989 èn alloura er las biatletas neidas vetiers e siva digl 2000 sa participeschan er giuvenils agls Campiunadis mundials da biatlon per juniors. Ad Osrblie èn 350 atlets ed atletas tgi cumbattan per medaglias e represchaintan 36 naziuns. Anc avant onns eran chegl per en po pi pacs biatlets e biatletas, ma cun gudagner chel sport adegna pi fitg a popularitad è igl interess per chel er nia adegna pi grond. Oz è biatlon en sport tgi atteira tar tot las occurrenzas schi blers aspectatours scu pacs oters sports. Gist an Germania è igl biatlon dasper igl ballape en sport tgi totga tar igls pi ancunaschaints. Pero er an Svizra ins canoscha siva da ples onns igl sport da biatlon, an spezial siva tgi Selina Gasparin, tgi stat a Lantsch, ò fatg ena medaglia d’argient tar igls Gis olimpics digl 2014 a Sotschi an Russia.

Gio per la terza geda

Per Laurin Fravi, igl biatlet da 20 onns tgi è da Lantsch, èn igls Campiunadis mundials da biatlon per igls juniors navot da nov. Ad Osrblie è el dalla parteida all’occurrenza mundiala gio per la terza geda cun esser sto selecziuno dus gedas per chel grond event.

Da preschaint è Fravi bagn an furma e cunzont ainten la loipa sa catta el fitg bagn. La sia fegnameira è da contanscher tar las cursas aglmanc en plaz 
top 10.

El spera cunzont da transfurmar las prestaziuns da sagettar digls trenadis sen las cursas, uscheia tgi la schanza da far en bung post è pi realistica.

El canoscha igl tratg

En talent tar igls biatlets è cunzont er Niklas Hartweg, igl fegl da Carola e Michael Hartweg, igl pêr tgi ò investo per realisar la Tgesa Nordica all’Arena da biatlon a Lantsch. Aint igl decurs dalla stad 2018 ò Niklas Hartweg mido domicil dalla Bassa a Lai, chegl er per pudeir trenar pi savens a Lantsch. Scu Fravi è er el nia selecziuno da Swiss Ski per igls Campiunadis mundials da biatlon digls juniors gio per la terza geda. Cun Niklas Hartweg aveir l’annada 2000 dastga el sa participar chest onn anc allas cursas digls 
giuvenils.

El canoscha fitg bagn igl tratg dalla loipa ad Osrblie e sen fundamaint da chegl spera el er da pudeir mussar bungas prestaziuns tar chell’occurrenza internaziunala cun 36 naziuns. Scu Fravi è er Niklas Hartweg commember digl cader C da biatlon da Swiss Ski.

Schanzas da far medaglias

Igl team svizzer ò an mintga cass potenzial avonda da turnar cun plessas medaglias dalla Slovachia. Cunzont Sebastian Stalder, igl Turitges tgi trenescha bler all’Arena da biatlon a Lantsch, è en veir tromf ad Osrblie. Chest anviern ò el gio gudagnea plessas cursas internaziunalas tar igls juniors e vala tar igls Campiunadis mundials da biatlon digls giovens dall’emda proxima scu egn digls gronds favorits.

Mental seia el pront pigl event tgi duess esser la culminaziun dalla staschung, punctuescha Stalder. Igl terz biatlet grischun dasperas Laurin Fravi e Niklas Hartweg è Nico Salutt da Zernez. Er el è en talent tar igl biatlon cun bunas schanzas da contanscher ad Osrblie en bung post. Tar las mattas ò cunzont Amy Baserga, la biatleta da Nossadunnang, la qualitad da far ena medaglia.