Gustar e guder quei ch’ins ha

(anr/abc) Avon quater onns han Ramona ed Edi Caduff da Degen cumpletau lur menaschi puril a S. Bistgaun cun in’ustria da scua el vitg. Quella ei occupada stedi. Hosps ed indigens gaudan la cuschina creativa. Truffels senza fin ha ei dau igl atun. Duront la stad havevan els raccoltau puaunas cotschnas ed alvas, izuns, iuas s. Gion. Sco quei ch’ins fageva pli baul han Ramona ed Edi Caduff elaborau tut. Cun lur emprendists e l’emploiada han els fatg tuargias ni schelentau, turriu, fatg tut il pusseivel culs fretgs selvadis e digl agen iert. En tut han els conservau 150 kilos fretgs. En tschaler ein ils agens truffels, lu han els priu en salv ulteriura vivonda, spina da grava, froslas, caschiel, zetgas, spinat ed auters legums. Quei ch’els han buca sezs e ch’els drovan per lur «ustria da scua» a Degen furnescha Ueli Hauenstein, il pur da legums da Rumein. Ils pèschs ed ils pulasters lumnezians vegnan da Curdin Capeder da Valgronda. Era frina digl agen èr, cunzun spelta, han ils purs da S. Bistgaun schau mular.

Atgna frina da triedi

Ramona ed Edi Caduff ein idealists, els creian ella vivonda autentica lumneziana. Ins sto buc esser dependents da products jasters. Avon quater onns ha il giuven pèr cumprau dalla Societad da consum ViVal Lumnezia la stizun che quella haveva stuiu serrar. Quei sempel baghetg, situaus sur la casa e schischom dalla famiglia Caduff, ei sepurschius per endrizzar in’ustria da purs. Per realisar lur visiun d’ina gastronomia sempla cun products unicamein lumnezians han Edi e Ramona Caduff duvrau enzatgei essenzial: creativitad e luvrusadad. Da nuot vegn nuot, mo cun star cun mauns en sac san ins buc esser creativs. Caussas finidas ord il pac, seigi per prepast, past principal ni dessert dat ei mai tier els. Culs truffels cuschina Ramona Caduff tuttas pusseivlas tratgas da truffels, en fuorn, coccas, gratins e buglia. «Nuot ord il pac» ei siu motto general.

Tiels desserts survescha ella bugen in cun meringues. Denton era buc in biscuit convenziunal. Il meringue ei violets e fatgs sez, cun alv d’iev, zucher e suc d’izuns. Ils dus emprendists e praticants han gidau da raccoltar tut quei che vegn duvrau per gentars e tscheinas. Vitier segidan Marionna Caduff, la mumma e sira, sco era ina persuna ch’ei engaschada tier els en plazza parziala.

Quei ch’els fan cun vivonda ell’ustrietta ei pil mument aunc in cussegl confidenzial. Dalla gievgia tochen la dumengia drovan els products «da cheu». Ramona cuschina in past che consista da quater tochen tschun tagliors. Ei dat per exempel bizochels cun frina da triedi ni spelta, furtem bov culla carn da lur animals, in menu da surpresa consista da quei ch’ei raccoltau, elaborau ni 
fatg sez.

Zatgei dat ei mai, numnadamein pommes frites. Culs biars truffels en tschaler savess ella far tals. Ella preferescha denton las variantas. Per exempel fa ella ils raviuls cun truffels barsai, cun zetgas, spinat ni caschiel. Ramona ed Edi Caduff porschan surpresas culinaricas. Gia las colurs che sepresentan sil taglier ein specialas ed envidan.

L’ustria a Degen ei aviarta la gievgia tochen la sonda dallas 16.00–22.00, la dumengia dallas 11.00 tochen allas 18.00. Tgi che vul seschar surprender duei s’annunziar, pertgei l’adressa confidenziala a Degen vegn pli e pli enconuschenta. Tel. 079 754 96 91.