Cassas da pensiun 
han smesà las reservas

L’onn passà è stà in schlet onn per far investiziuns. Quai badan er las cassas da pensiun. Las cassas da pensiun svizras han gì la fin dal 2018 be anc la mesadad da las reservas ch’ellas avevan in onn avant. Quai demussa il nov monitur da cassas da pensiun da Swisscanto. Las obligaziuns finanzialas da las cassas sajan dentant pli che segiras. En media hajan las cassas da pensiun da dretg privat cun 107,7% anc adina in grad da garanzia solid. Passa 90% da las cassas da pensiun hajan in grad da garanzia da 100% e dapli. Tenor calculaziuns da Swisscanto han er las cassas da pensiun da dretg public diminuì durant l’onn passà lur grad da garanzia per 4,4 puncts procentuals sin 101,5%. Tar quellas cassas han anc stgars trais quarts in grad da garanzia da passa 100%.

Tranter Zezras e Vaz Sut bajegia la confederaziun dapi il schaner 2019 ina nova punt da colliaziun. Fin il settember duessan cuzzar las lavurs. Las vischnancas vesan il project da construcziun sco grond plus. Cunquai che la nova punt è ina via da la confederaziun na ston las vischnancas betg pajar ella. Ella vegn a custar radund 34 milliuns francs. «Nus survegnin ina punt che tegn quint dal traffic grond da mintgadi», di il president communal da Termin Roman Hug. Vuschs negativas dettia tenor el mo paucas. Quels paucs sajan surtut quels ch’han quintà cun dapli canera e colonnas dad autos durant il temp da construcziun. Cunquai che la colliaziun traversala è la suletta pussaivladad dad ir a Vaz Sut sa mussa il president communal Hans Krättli fitg cuntent: «Igl è in grond meglierament da nossa via d’access.» Schebain che la vischnanca è fitg dependenta da la punt han tschellas vischnancas gì dapli lavur administrativa. Il terren nua che la punt vegn bajegiada tutga numnadamain a Zezras e Termin. La punt existenta era vegnida bajegiada en ils onns 70.