Politichers dalla dretga – 
per la vusch dalla baselgia

(cp) Il president dalla Partida cristiandemocratica svizra, cuss. naz. Gerhard Pfister, e la teologa e liberala Béatrice Acklin Zimmermann, han fundau – cun aunc enzacons – la gruppa «Thinktank – Baselgia/politica». Quella cusseglia als representants e plidaders dallas baselgias da buca semischedar ella politica. Sin quei ha ei dau vehementas reacziuns.

Politichers ord il segment conservativ dallas partidas vulan saver nuot da metter si buccari alla baselgia. Hanspeter Hugentobler dalla Partida evangelica svizra, che candidescha per la regenza turitgesa, considerescha la vusch dalla baselgia ella politica sco zun preziusa, argumentond: «Posiziuns da baselgias ein – a basa da lur valurs eticas – in agid per s’orientar era en damondas politicas. Nus duvrein muossavias dallas baselgias che regordan nus politichers d’agir a liunga vesta ed en responsabladad, sco quei ch’il preambel dalla Constituziun federala pretenda.»

Il cuss. naz. dalla pps turitgesa, Gregor Lutz, s’irritescha era sur da critica da representants dallas baselgias. El manegia denton: «Mo pervia da talas posiziuns extreschel jeu buca dalla corporaziun. Igl ei impurtont ch’ins di era leu siu meini.»

In tec auter tuna ei tier la cuss. naz. dalla pps, Natalie Rickli, che candidescha per la regenza turitgesa. Ell’ei extrada pervia da critica viers sia tenuta politica ord protest ord la baselgia catolica, constatond: «Jeu sun s’irritada savens che representants dallas baselgias semischeidan ella politica. Quei ei falliu, essend che las baselgias han dad esser cheu per tuts: per giuvens e vegls, per rehs e paupers, sco era per la ps e la pps.» Ella paga denton – enstagl dalla taglia da cultus, che croda naven cun l’extrada dalla baselgia – ina contribuziun al fondo da solidaritad alla diocesa da Cuera, creaus per tals cass.