La mort da 
tschintg gigants

(rtr) A Fontanivas sut Mustér surveglian divers pigns da ca. 50 meters autezza il campadi. Uss han tschintg da quels coloss stuì crair londervi. Tranter cumpogns pli pitschens na dattan els betg uschè en egl sco la «Panera» da Luven – ma er ils pigns sper il campadi Fontanivas a Mustér èn gigants. Malgrà ch’els èn be var 150 onns vegls èn els marschs e savessan perquai crudar enturn. Cun quai ch’intgins dals pigns èn en vischinanza dal plaz da rulottas mettessan els da stad en privel ils giasts dal campadi. Per quai ha l’Uffizi forestal da Mustér decis da smerscher els. Malgrà la gronda rutina dal selvicultur Simon Cathomen e ses team è smerscher tals gigants ina sfida tut speziala. Els hajan da planisar bain nua ch’ils pigns duajan crudar per ch’els na fetschian betg gronds donns. Smerscher els d’enviern saja d’avantatg cun quai ch’il terrain è schelà. Er la maschina da racolta vegn a ses cunfins: La tocca dals pigns smers ch’ella ha da strair or dal guaud paisa per part fin ad otg tonnas. Mintgin dad els dat enturn 10 cubics laina. Quella sa be anc vegnir duvrada per far zinslas per il stgaudament da Mustér. Quai è in pitschen confiert per quels dal campadi. In exemplar bel e grond è anc frestg e saun – e quel dastga survegliar vinavant las tendas e rulottas a Fontanivas.