La rolla dalla neiv en connex cun energia regenerabla

Da Hans Huonder / anr

La nova strategia d’energia dalla confederaziun, mo era la midada dil clima fatschentan il mument intensivamein la scienzia, mo era la pratica. El rom dils «dis da discussiun davart la perscrutaziun dall’energia» a Mustér ha Michael Lehning digl Institut per la perscrutaziun da neiv e lavinas (SLF) a Tavau presentau in interessant studi davart la rolla dalla neiv en connex cun la producziun d’energia regenerabla.

«La Svizra semida fermamein ed ella vegn a semidar vinavon. A quei svilup attribueschan ils dus facturs che pertuccan la midada dil clima sco era la midada da strategia dall’energia. La muntogna ei pertuccada essenzialmein da quels dus facturs», di Lehning. En in referat als «dis da discussiun davart la perscrutaziun dall’energia» en claustra a Mustér eis el sefatschentaus en quei connex dalla rolla che la muntogna, en special denton la neiv, gioga en connex cun quellas midadas che semanifesteschan il mument.

Tgei rolla gioga la neiv?

Lehning ch’ei responsabels al SLF per process da neiv e scheltira permanenta ha tematisau ils aspects dalla muntada dalla neiv en connex cun la producziun d’energia, mo era co la midada dil clima vegn a s’effectuar sin la neiv. El ed ulteriurs perscrutaders ein sefatschentai oravontut dallas pusseivladads futuras dalla producziun d’energia solara ellas muntognas.

En quei connex ei setschentada surtut la damonda co la neiv – respectivamein la reflexiun da quella – sa vegnir nezegiada il pli efficient. Sebasond sin l’installaziun d’indrezs da solar ellas muntognas svizras ei vegniu elavurau scenaris da producziun d’energia cun agid da sulegl, vent ed aua che savess remplazzar plaun a plaun l’energia atomara producida en Svizra. Dallas examinaziuns fatgas ei semussau ch’il potenzial per la producziun d’energia surtut solara ei gronds. Tenor Lehning fuss ei pusseivel da cuvierer cun ina surfatscha da 42 kilometers quadrat da fotovoltaica rodund ina quarta digl entir consum d’electricitad en Svizra, vul dir remplazzar cumpleinamein las ovras atomaras existentas. Sin quella surfatscha fuss ei pusseivel da producir annualmein 12 terawatt/uras.

Muntognas ein predestinadas

Sin fundament dallas cundiziuns che regian en muntogna ei la producziun d’energia solara leu in bien ton pli adattada ch’ella Bassa. «Abstrahau dalla reflexiun dalla neiv havein nus leu era buca tonta nebla ch’impedescha la producziun», di Lehning. Ins ha denton aunc constatau in auter effect: «Era tier in tschiel serein sereducescha l’irradiaziun dil sulegl significantamein pli a bass ch’ins va. Quei vul dir ch’ella ei pli gronda ell’altezia ch’ella Bassa.» Las examinaziuns muossan ch’igl ei pusseivel da contonscher ellas Alps rodund 20 pertschien dapli producziun d’energia ch’els marcaus.

La cozza da neiv stagiunala augmenta la producziun annuala aunc ina ga per rodund diesch pertschien. «La cozza da neiv ella muntogna ha plinavon igl effect ch’ils moduls da solar san vegnir installai en ina pendenza pli teissa ed ein cheutras buc aschi marcants en lur cumparsa», constatescha Lehning.

Energia digl unviern

Tenor Lening ei la cumpensaziun dall’energia atomara en Svizra cumpleinamein realistica sin fundament dil nez da novas fontaunas d’energia regenerabla: «Ei dat biaras pusseivladads da cumbinaziun che meinan a quella finamira.» In’impurtonta rolla en quei connex savess l’energia solara giugar, leutier l’energia producida cun agid dil vent ni la geotermia. Cun ina capacitad da 13 gw d’energia solara ei in menaschi stabil dalla reit d’electricitad svizra pusseivels. Leutier duvrass ei in’installaziun da moduls cun ina surfatscha dad 80 kilometers quadrat. «Aschia stuess buca vegnir importau dapli electricitad ch’ussa ed il squetsch sils indrezs da transmissiun sereducess schizun ella media», di Lehning. Il volumen da commerci cugl exteriur s’augmentass tonaton pil dubel. Tier in surproducziun vegness ei exportau dapli ch’oz ed ei fuss cheutras era necessari da cumprar anavos dapli energia. «Las retschercas muossan che la midada dalla strategia d’energia ei pusseivla schizun cun ina fetg pintga cumpart dalla geotermia e l’energia da vent», constatescha el. Cun in nez pli intensiv dall’energia regenerabla sco per exempel la solara savess la Svizra salvar si’autonomia e stabilitad dil sistem energetic.

Da meins neiv

Tenor models elavurai ils davos onns vegn la midada dil clima a purtar alla Svizra egl avegnir dameins neiv igl unviern, persuenter dapli plievgia. Quei savess haver in effect negativ denter auter sil turissem d’unviern. Schebein ei vegn a dar la stad dameins precipitaziuns sco prognosticau ei denton ina damonda dispiteivla. Cheutras duess la producziun d’energia hidraulica esser garantida ed aschia era contribuir pli fetg al consum d’energia igl unviern. Tenor Lehning ston ils indrezs per la producziun d’energia solara vegnir plazzai aschia ch’els san nezegiar optimalmein l’irradiaziun dil sulegl e la reflexiun dalla neiv: «Damai che la cozza da neiv vegn a star stabila en regiuns propi aultas era egl avegnir ston indrezs solars vegnir favorisai leu. Per impedir ch’il maletg dalla cuntrada piteschi duess ins ponderar da nezegiar persuenter loghens cun lavineras. En biars cass sesanflan lavineras leu nua ch’il sulegl ei era ferms e nua ch’ei ha era bia neiv.» Ina dallas damondas essenzialas ch’ei aunc buca rispundida en quei connex ei quella dil transport dall’energia naven dil liug da producziun el liug da distribuziun, respectivamein dil diever.