Militar sto tuttina pajar l’operaziun per la spatla schlugada

Da Claudia Cadruvi / ANR

Trais giadas ha in giuven um subì ina luxaziun da la spatla ed ha schlugà il bratsch ord la giugadira. La segunda giada èsi capità durant il servetsch militar. L’assicuranza d’accidents dal militar n’ha betg pli vulì pajar suenter il terz accident. Uss ha il Tribunal federal decidì. L’emprima giada capiti l’enviern 2010. Il giuven che fa in emprendissadi da scrinari cupitga durant ir cun snowboard e schluga la spatla sanestra. La stad vegn il giuven operà per stabilisar la giugadira. L’assicuranza d’accidents surpiglia ils custs. Il 2012 durant in exercizi en la scola da recruta capita puspè in accident ed il giuven fa ord lieu la spatla. L’assicuranza d’accident dal militar paja ils tractaments.

Dertgira grischuna 
dat raschun a Helsana

Il settember 2013 rocla l’um durant ir cun skateboard e la giugadira sa schlucca puspè. Il schaner 2014 sto el danovamain schar operar per stabilisar la giugadira. La Helsana, sia assicuranza d’accidents, è dentant sulet pronta da surpigliar ils custs enfin il december 2013. L’operaziun dal schaner na vul ella betg pli pajar, pertge lezza saja stada la consequenza tardiva da l’accident durant la recruta.

La Dretgira administrativa dal chantun Grischun dat raschun a la Helsana sa basand sin in parairi d’in medi. L’accident cun skateboard haja numnadamain mo procurà per in pegiurament e betg per ina midada essenziala. Suenter trais mais saja quest pegiurament puspè stà curà or e la spatla saja stada en il medem stadi sco avant l’accident cun skateboard. Las dolurs suenter quels trais mais sajan da manar enavos sin l’accident da militar.

Conferma dals 
derschaders da Losanna

L’assicuranza dal militar n’è betg stada d’accord cun la decisiun da la Dretgira administrativa ed ha recurrì a Losanna. Il Tribunal federal ha confermà che l’assicuranza actuala saja mintgamai responsabla per in pegiurament actual, vul dir: La Helsana sto pajar per il tractament chaschunà entras la cupitgada cun skateboard. Ma suenter sto puspè quella assicuranza pajar ch’è stada obligada da surpigliar las prestaziuns da tschel accident. Tenor il Tribunal federal èsi cler che la spatla da l’um è suenter radund trais mais puspè stada en il medem stadi sco avant l’accident cun skateboard e che pia l’assicuranza dal militar è obligada da pajar l’operaziun ch’ins ha fatg pir suenter quests trais mais.

La critica da l’assicuranza militara che la resumaziun dal parairi dal medi n’haja gnanca menziunà l’accident durant la recruta n’han ils derschaders betg laschà valair. Il medi saja en ses parairi numnadamain sa fatschentà da rudent cun quest accident.

Sentenzia 8C_366/2018 dals 21 da december 2018, publitgada ils 23 da schaner 2019