Na a franar la 
construcziun dischordinada

Ils giuvens verds vulan transfurmar radicalmain la planisaziun dal territori cun lur iniziativa, che vegn ils 10 da favrer avant il pievel, tras franar in’ulteriura extensiun da la zona da construcziun. Era duai la dimensiun totala actuala da las zonas da bajegiar vegnir bloccada per temp illimità. Novas zonas da construcziun fissan be pussaivlas sch’ina surfatscha tuttina gronda e da cumparegliabla valita agricola vegniss enzonada. Quest’iniziativa resguarda ni ils basegns da la populaziun ni da l’economia ed era betg las atgnadads da chantuns e regiuns.

L’iniziativa per franar la construcziun dischordinada chastiass gist quels chantuns e vischnancas che sa dattan gia fadia dad ir enturn economicamain e cun enzonar terren tenor basegns. Il stop previs per novas zonas restrenschess fermamain las pussaivladads da svilup. Persuenter vegnessan chantuns, ch’han enzonà fin uss generusamain e disponan perquai da zonas da construcziun surdimensiunadas e nunadattadas, schizunt a profitar dal stop dad enzonar.

Quai n’è betg fair ed ha consequenzas cuntraproductivas. L’entira surfatscha da bajegiar vegness translocada en in lieu nua ch’i dat anc terren da construcziun, era sche quel è fitg isolà e grevamain da cuntanscher. Qua tras na vegn la construcziun dischordinada betg franada, mabain schizunt anc promovida. L’iniziativa da franar la construcziun dischordinada è be ina schliaziun simulada.

Gist ed impurtant èsi da nizzegiar meglier la surfatscha d’abitadis en Svizra e da fixar las zonas da construcziun moderadamain. A quest intent serva la lescha da la planisaziun territoriala, revidida 2013. Confederaziun e chantuns èn dapi alur vidlonder da realisar las mesiras previdas. Quellas èn pli inditgadas ed effizientas ch’in stop nundifferenzià ed illimità dad enzonar. Cun las mesiras gia prendidas e las previdas tras la lescha revidida da la planisaziun vegn la construcziun dischordinada gia franada effizientamain. L’iniziativa concernent franar la construcziun dischordinada è pia davanz ed inutila e perquai da refusar.Pcd svizra