Pusseivel mo cun transparenza

Da Hans Huonder / anr

Ils representants dallas vischnauncas e dils cantuns da concessiun pretendan dallas ovras electricas transparenza pertuccont lur cuosts. Quella seigi necessaria per anflar ina soluziun en connex culs tscheins d’aua futurs. Duront treis dis ein scienziai, perscrutaders, representants dall’economia e dalla politica sefatschentai a Mustér dalla producziun d’energia electrica egl avegnir. En rodund 30 referats ed in arranschament public ein models e pusseivladads vegni discutai. Sper enconuschientschas novas e tecnologias futuras per la producziun d’energia han era ils tscheins d’aua dau da discutar. Ina ga dapli. Ferton ch’ils representants dallas vischnauncas concessiunaras e dils cantuns pretendan era egl avegnir in tscheins silmeins ella dimensiun dad ussa pretendan ils representants dallas ovras electricas cumpromiss per anflar ina soluziun. Pil secretari general dalla conferenza dallas regenzas dils cantuns da muntogna, Fadri Ramming, eis ei denton clar: «Sche nus lein anflar ina soluziun drova ei transparenza da cuosts.» E Walter Deplazes, commember dalla suprastonza dalla Cuminonza d’interess dallas vischnauncas da concessiun grischunas, puntuescha: «Senza ina relaziun da confidonza vegn ei buc a dar aschi spert in niev model.»

Pagina 3