Val S. Pieder: Nova structura turistica

(anr/hh) Las organisaziuns existentas dil turissem a Val S. Pieder duein vegnir fusiunadas. Davart quels plans e las finamiras ha ina gruppa da lavur orientau vischinas e vischins la sonda sera. El center dalla restructuraziun stattan las organisaziuns existentas. Las Pendicularas da sport Val S. Pieder SA cun lur territori da skis, Visit Val cun biro d’informaziun da turissem, scola da skis e purschida turistica e Marketing Val cun reclama e marketing duein vegnir tuts sut il tetg dalla nova societad cul num Visit Val SA. Tenor la gruppa da lavur duein tuttas activitads relevontas dil turissem vegnir fusiunadas en in’organisaziun satella ed efficienta, aschia ch’ina societad ei responsabla egl avegnir pil svilup dil turissem a Val S. Pieder. A quella societad nova duei la vischnaunca esser participada essenzialmein, quei ch’ei oz gia il cass tier las pendicularas da sport. Differenta purschida duei l’organisaziun nova surprender a basa da cunvegnientschas da prestaziun. Quei haveva la vischnaunca decidiu gia igl atun vargau. En quei connex setracta ei dalla teleferica, il bus da viandar ed il menaschi dil biro d’informaziun. L’organisaziun nova duei esser responsabla pils eveniments dils hosps el liug, l’informaziun turistica, il marketing dil liug, l’infrastructura e surtut era pil menaschi dil territori da skis e la gastronomia da lez.

Sin miez digl onn

Sco quei che la vischnaunca da Val S. Pieder scriva en ina communicaziun als mieds da massa san per exempel hoteliers e possessurs d’habitaziuns da vacanzas daventar acziunaris dalla societad nova ed aschia separticipar activamein a quella. Al cussegl d’administraziun dalla societad nova duein appartener representants dalla hotellaria respectivamein il commerci, la parahotellaria, ils possessurs d’habitaziuns secundaras sco era dalla vischnaunca. La finamira ei d’introducir la structura nova miez digl onn parallelmein cul niev concept da finanaziaziun approbaus dalla radunonza communala e la votaziun all’urna dalla vischnaunca la fin digl onn passau. Tenor la vischnaunca vegn l’organisaziun nova ad haver en emprema lingia il pensum da fixar la strategia pil liug e sviluppar positivamein il turissem. Il mument vegnan discussiuns intensivas en quei connex menadas. La finfinala ei era vegniu orientau la populaziun davart il project per ina gronda zona da cultura dalla vart seniastra dalla val. Cheu duein artistas ed artists saver luvrar e mussar lur lavurs.