La MiMS an fiac a flomas

(rs) La Musica instrumentala Muntogna da Schons (MiMS) deditgescha igl sieus conzert da quest on digl tutafatg agl tema «fiac». Igls numerus tocs musicals ca resùnan uon buglian digl temperamaint, d’acziùn a d’energeia. Sco giast â la MiMS anvido igl artist Joseph Stenz da vagnir a Donat. El vala scu artist da glisch a fuganaglias par excellence ad incantescha igl publicum cun la sia perfurmaziùn fulminànta. Da cuminànza cun el preschaintan igls 40 instrumentalists da la MiMS sut direcziùn da Walter Stenz egn singular evenimaint musical a visual. Cugls tùns da la fanfara da «Rise of the firebird» (Igl utschi da fiac sadòlza) da Stefen Reineke antscheva la preschantaziùn cun schar sgular igl utschi da fiac. Igl toc inspiro da la musica spagnola «Montañas del fuego» (Muntognas da fiac) da Markus Götz gioja sen l’insla vulcanica da Lanzarote a respievla las impressiunàntas «muntognas da fiac» da là. Agl aranschamaint digl dirigent Walter Stenz davart la canzùn rumàntscha «Scha füss ün’utschella» da Tumasch Dolf sùnan sei ear duas geias ad egn’arpa. «Great balls of fire» sacloma l’ancunaschainta canzùn da Jerry Lewis, aranscho da Frank Bernaerts. Que toc a la jazz a rock cuntegna igl ancunaschaint text «You kissed me baby, woo, it feels good» (Tei mi âs bitschieu, marusa, uh, sco quegl fa bagn.) Digl cumponist Vangelis dariva la musica tigl film «Charriots of fire» (Tgars da fiac) cugl tetel tudestg «Die Stunde des Siegers». Igl toc «Samhain» da Donald Furlano raquenta egna magica istorgia keltica.

La prova prinzipala â liac vendergis, igls 8 da favrer a las 20.15. Igl conzert anual da la MiMS vean preschanto sonda, igls 9 da favrer a las 20.15 an la sala polivalenta a Donat. Suainter igl conzert dat igl notg libra cun la «Ländlerkapelle GrischArt».