«L’onn 2119 en terra rumantscha”

(cp) La Lia Rumantscha ha lantschà la concurrenza Plima d’aur/Pledpierla ch’ha quest onn il tema «L’onn 2119 en terra rumantscha». Las victuras ed ils victurs dastgan preschentar lur texts al festival da giubileum «100 onns Lia Rumantscha» ch’ha lieu dal 1. fin ils 18 d’avust a Zuoz. Cun la concurrenza Plima d’aur/Pledpierla vul la Lia Rumantscha promover il plaschair da scriver d’uffants, giuvenils e giuvens creschids da nov fin 25 onns. La Lia Rumantscha envida las poetinas ed ils fabuluns da la Surselva, dal Grischun central e da l’Engiadina da sa participar a la concurrenza da scriver Plima d’aur/Pledpierla. Quest onn ha ella il tema «L’onn 2119 en terra rumantscha». La Lia Rumantscha po festivar il 2019 ses giubileum da 100 onns. Cun questa chaschun vul ella drizzar l’egliada vers il futur ed animar da guardar exact 100 onns enavant. Ils uffants, giuvenils e giuvens creschids da nov fin 25 onns pon scriver lur text en l’idiom u en rumantsch grischun. Ils texts na dastgan betg esser pli lungs che duas paginas scrittas a maun u max. 6000 segns (incl. spazis vids). L’ultim termin per inoltrar ils texts è ils 19 d’avrigl 2019. La premiaziun dals megliers texts ha lieu l’entschatta da zercladur 2019 en tuttas trais regiuns. Las victuras ed ils victurs dastgan preleger lur texts a chaschun dal festival «100 onns Lia Rumantscha». Plinavant vegnan ils texts preschentads en la revista «Litteratura». La giuria sa cumpona da persunas dal schurnalissem, da scolastas e scolasts e dad auturas ed auturs. La concurrenza da scriver Plima d’aur/Pledpierla ha lieu mintga dus onns e sa drizza a poetinas e fabuluns da tuttas regiuns rumantschas. Ell’unescha oz las duas concurrenzas da scriver iniziadas da lezzas uras da la Renania e l’Uniun dals Grischs.

Orientaziuns

– La concurrenza per fabuluns e poetins ha lieu mintga dus onns en las trais regiuns Surselva, Grischun central ed Engiadina.

– La Lia Rumantscha definescha in tema per la concurrenza. Sco texts pon vegnir inoltrads reportaschas, retschertgas, paraulas, fablas, poesias, crimis euv.

– Ils magisters survegnan ina glista cun impuls da scriver sco sustegn ed inspiraziun.

– La giuria survegn criteris da valitaziun communabels. Ella sa cumpona da persunas dal schurnalissem, da magistras e magisters e d’auturas ed auturs.

– Ils victurs dastgan preschentar lur texts a chaschun dals 100 onns LR a Zuoz.

– Ils texts dals victurs vegnan preschentads en la revista «Litteratura».

– La magistraglia vegn infurmada davart la concurrenza per posta mez schaner 2019.

– Il tema da l’onn 2019 è «L’onn 2119 en terra rumantscha».

– I dat quatter categorias: 3./4.cl., 5./6.cl, 7.–9.cl., 17–25 onns.

– Per mintga categoria spetgan premis da daners da 60 enfin 300 francs

– Ils texts na dastgan betg esser pli lungs che duas paginas scrittas a maun u max. 6000 segns (senza segns vids). L’ortografia sto vegnir controllada avant ch’ils texts vegnian inoltrads.

– Signar ils texts cun il pseudonim.

– Emplenir il raster da persunalias per mintga scolar/A.

– Ils texts pon vegnir inoltrads en tut ils idioms ed en rg.

– Ils texts pon vegnir inoltrads en furma digitala u sin palpiri.

– L’ultim termin per inoltrar ils texts è ils 19 d’avrigl 2019.

– La premiaziun ha lieu l’entschatta zercladur en tut las trais regiuns.

– Ils texts, ensemen cun il raster da persunalias, vegnan inoltrads als promoturs regiunals da la LR:

Engiadina: Lia Rumantscha, Martina Shuler, Via Principela 18, 7523 Madulain, martina.schuler@rumantsch.ch

Grischun central: Lia Rumantscha, Carmen Dedual, Stradung 23, 7460 Savognin, carmen.dedual@rumantsch.ch

Surselva: Lia Rumantscha, Alice Bertogg Via Städtli 18, 7130 Glion, alice.bertogg@rumantsch.ch

Ulteriuras infurmaziuns:

www.liarumantscha.ch