La baselgia ei en ina greva crisa

(cp) Duront sia viseta en Panama – a caschun dalla Dieta mundiala dalla giuventetgna – ha papa Francestg constatau aviartamein che la baselgia secatti en ina greva crisa. Ella seigi senza orientaziun e surdumandada. In motiv persuenter seigi il scandal culs abus. La peisa da quels hagi paralisau la baselgia. La speronza munconta derivi dil fatg che la baselgia seigi vulnerada e ch’ella hagi buc udiu dallas gadas ils numerus grius dils pertuccai.

Quei ha papa Francestg detg a caschun d’in survetsch divin avon spirituals, monasts e laics e tier la consecraziun digl altar ella catedrala da Santa Maria a Panama-Marcau.

Il papa ha buca tangau expressivamein il tema dils abus en siu priedi. Sias constataziuns ein denton sebasadas sin quei ch’el hagi adina puntuau ils davos meins, selamentond che cass d’abus seigien buca vegni pri serius. En pliras tiaras – sco ell’America ed el Chile – secatti la baselgia pervia dad abus tras spirituals e cun zuppentar vi quei en ina greva crisa da confidonza. Alla fin da fevrer vegnien ils uestgs a s’occupar da quei tema el Vatican.

Papa Francestg ha era plidau d’ina baselgia disorientada: Spirituals, monasts e commembers da moviments laics stettien savens sut in grev squetsch. Dapi in temps seigi ina stauncladad subtila seschluitada viaden. Quella entscheivi cun quei ch’ins sappi buca co reagar en vesta all’intensitad e malsegirtad che fetschien nunpusseivel da mirar egl avegnir muort la midada che nus fagein atras sco societad.

Il papa ha denton admoniu spirituals, monasts e laics da buca sefitgar sin ina tala tenuta emoziunala. Enstagl ha el appellau da tschercar vias co la baselgia sappi defender era oz siu plaz ella societad.