Ôr per Niklas Hartweg

DA GION NUTEGN STGIER / ANR

Grond success pigl biatlet Niklas Hartweg da Lai. Ad Osrblie (Slovachia) gudogna el la cursa singula da 12,5 km e vign campiun mundial tar igls giuvenils. Tar igls juniors ò Laurin Fravi da Lantsch mantganto per pac en top-diesch resultat. Da preschaint on lia ad Osrblie igls Campiunadis mundials da biatlon digls juniors e digls giuvenils. Dalla parteida èn 350 biatletas e biatlets da 35 naziuns, damai igls stars da dumang tar igl biatlon. Ple u manc mintga tera ò tarmess an Slovachia igls sies pi ferms juniors e giuvenils e las miglras mattas da 16 anfignen 23 onns. Agl team svizzer appartignan set biatlets e biatletas. En fatg plaschevel è tgi cun Niklas Hartweg da Lai e Laurin Fravi da Lantsch ò Swiss Ski er risguardo dus atlets da nossa regiun. Vetiers vign tgi cun Nico Salutt da Zernez fò en ulteriour biatlet grischun part agl cader svizzer.

Angal en sbagl

Niklas Hartweg, el tgi ò 18 onns, era per- tschert tgi cun ena buna prestaziun tar igl teir seia pussebel bler ainten la cursa singula sur 12,5 km. Cun canoscher pi bagn igl tratg dalla loipa davigl pac oter tgi da sagettar precis per tigneir pitg alla concurrenza. Chegl è alloura reuschia exemplaric a Harteweg cun far angal en sbagl sen en total da 20 schozs. Cuntrari allas cursas da biatlon dalla Coppa mundiala noua tgi è da far per mintga sbagl ena runda da castei vign tar igls giuvenils per mintga sbagl vetiers 45 secundas tar igl taimp. Tar las cursas digls juniors èn chegl schizont 60 secundas per sbagl.

En avantatg da 25 secundas

Dalla partenza alla cursa èn stos 105 giuvenils e tranter chels er varsaquants tgi on gio fatg cursas da juniors dall’IBU, l’Uniun internaziunala da biatlon. Igl fundamaint per sies pi grond success da carriera ò Hartweg fatg cun sagettar excellent, dantant er cun esser fitg spert ainten la loipa. Alla fegn ò el gudagnea la cursa cun en avantatg da 25 secundas segl Norveges Trym Gerhardsen e segl Tschech Jakub Kocian. Chel perda segl nov campiun mundial Hartweg 33 secundas e gudogna uscheia la medaglia da bronz. Remarcabel è bagn tgi tranter igls 12 miglers dalla cursa sa cattan tuttegna biatlets dad 11 naziuns. Igl victour è sa musso ple tgi angal ventirevel siva dalla cursa e detg da tuttegna esser sursto da sies success.

Angal treis secundas

Ainten la cursa singula digls juniors cun ena distanza da 15 km on gist treis biatlets svizzers persvadia. Egn da chels è Laurin Fravi, igl atlet da Lantsch tgi ò 20 onns. El è nia 13avel da 100 biatlets e mantganto igl 10avel plaz angal per treis secundas. La sia fegnameira era da contanscher en plaz tranter igls miglers diesch participants. Da 20 schozs ò Fravi sbaglea angal dus, chegl tgi è en bung resultat. En bung resultat è alloura cunzont reuschia agl Turitges Sebastian Stalder cun neir 5avel. Nico Salutt, igl biatlet engiadines, è nia 7avel e cumpletto la buna prestaziun dall’equipa svizra. Gudagnea la cursa e davento campiun mundial digls juniors è igl biatlet franzos Marin Burgeois cun en avantatg da treis secundas sen Mikita Labastau dalla Bielorussia e sen Danilo Riethmueller, igl Tudestg tgi ò pers segl victour quatter secundas, betg igl davos cun far dus sbagls tar igl teir.