Ei tucca vinavon da gis

(anr/abc) Dumengia sera ha la suprastonza dalla pleiv Ruschein-Pigniu-Rueun-Siat envidau parochianas e parochians ad ina radunonza extraordinaria. El center ei stau il tuchiez dalla baselgia s. Flurin a Siat. Varga 30 persunas ein separticipadas dumengia sera a Siat alla radunonza extraordinaria da pleiv. Ils da Siat han giu da tractar l’isolaziun dil clutger dalla baselgia da s. Flurin e da decider sch’ins vegli prender ulteriuras mesiras pertuccont la «canera» dil tuccar da gis. La suprastonza cun siu president Hugo Schär ha presentau la caussa e parochianas e parochians han saviu prender posiziun leutier. Cun gronda maioritad ha la radunonza decidiu, suenter ina discussiun objectiva, da mantener il tuccar da gis sco tochen dacheu. La clara decisiun seresulta dalla experientschas ch’habitontas e habitonts da Siat han fatg il davos miez onn sco era dall’expertisa da canera. Avon in onn, ils 20 da schaner 2018, haveva la radunonza da pleiv giu da s’occupar dalla medema caussa. Habitonts da Siat ch’han cumprau casa el vitg havevan reclamau ch’il tuccar da gis disturbi massiv els. Il tun da quei zenn svegli regularmein els e laschi buca pli anflar la sien. Els han supplicau da prender mesiras encunter la «canera», lur proposta preferida fuss stada da tschentar giu il tuccar da gis a Siat. La suprastonza dalla pleiv ha retschiet la reclamaziun, ha tractau quella e convocau ina radunonza. Per contonscher ina reducziun dalla «canera» ha la radunonza d’avon in onn dau suatientscha alla proposta dalla suprastonza. Ins ha lubiu il credit per la lavur d’isolar il clutger. Finamira eri stau da reducir il livel da canera e limitar quel sin maximal 8–10 decibels. Igl uost 2018 ha l’interpresa da tuchiez fatg la lavur cun installar tablas specialas d’isolaziun. Silsuenter han ins entschiet a mesirar igl effect. Sco quei che l’expertisa muossa ha l’isolaziun el clutger saviu reducir il tun. Las mesiraziuns muossan ussa maximalmein otg decibels, quei ch’ei sut las valurs dalla norma legala en Svizra. Il tuchiez dalla damaun marvegl, ina vegliandra isonza els vitgs, annunzia pia vinavon als da Siat ch’ei fetschi gis.