Agens projects e finamiras

(GiuRu) L’emprima sesida da la suprastanza da la Giuventetgna Rumantscha (GiuRu) en il nov onn ha gì lieu a Cuira en l’ustaria «Zum Metzgertor» manada da Catarina Jenny. La cuschiniera è uriunda da Preaz en la Muntogna da Schons e maina dapi intgins onns l’ustaria cun tratgas tipicas grischunas-mexicanas a l’Arcas en la citad veglia da Cuira.

Nus avain l’emprim discutà e tegnì sesida en noss biro cumpartì avant che nus avain tschainà e discutà libramain davart projects e miras per la GiuRu. Ina sfida che la GiuRu ha è da tegnair ina tscherta structuraziun funcziunanta. Uschia è il contact tar las singulas giuventetgnas bunamain inexistent, ma era tar ils singuls commembers n’ha la GiuRu betg gist in stretg contact, ma adina meglier. Lura n’ha ina commembranza tar la GiuRu era nagin avantatg directamain visibel. Era quai vulain nus midar en quest onn nov. Probablamain cun sustegnair locals da cultura, cunzunt musica e litteratura, en il territori rumantsch. Pertge là ha la GiuRu fitg buns contacts tar la scena culturala rumantscha. Las bleras dumondas da sustegn derivan da là tar la GiuRu. Talas dumondas ha la suprastanza tractandà avant ch’ir a tschaina.

Fin ils 27 d’avrigl 2019 sa cumpona questa suprastanza anc suandantamain: Uolf Candrian, president; Maurus Bundi, vicepresident; Michelle Parli, actuara; Swen Gaberthüel, cassier; Leander Albin, assessur; Naomi Arpagaus, assessura. Lura vegni er a dar intginas midadas, Swen Gaberthüel banduna la suprastanza suenter dus onns perquai che l’uffizi da cassier sa cruscha memia bler cun la professiun.

Sonda, ils 27 d’avrigl 2019 ha lieu la radunanza generala da la GiuRu nua che nus vegnin a tscherner ina nova suprastanta che surpiglia il post da cassiera. Nus avain gia ina candidata che nus vegnin a preschentar a Cuira, uschia che nagin privel da vegnir sfurzà en in uffizi è avant maun durant la radunanza. Bun fiss dentant sch’er inquals vegnissan per eleger la nova suprastanta dal Surmeir. La saira ha era lieu in concert en il local cumpartì e sch’insatgi ha veglia da durmir a Cuira po la GiuRu er organisar ina chombra u in letg. T’annunzia sche ti vegnas e nus pudain guardar ensemen.