Protecziun dal clima duai vegnir francada en la Constituziun

(rtr) Cun l’iniziativa da glatschers duai la protecziun dal clima vegnir francada en la Constituziun e las emissiuns da gas da serra duain vegnir reducidas fin l’onn 2050 sin nulla. A partir dal 2050 na duai dar nagins carburants fossils pli tar il traffic en Svizra, pretenda il moviment. Cumenzar a rimnar suttascripziuns vulan ils iniziants dentant pir sche 20 000 persunas sustegnan il project. L’iniziativa vul tranter auter che las finamiras da la cunvegna dal clima da Paris dal 2015 vegnian fixadas en la Constituziun. L’iniziativa saja necessaria perquai che la politica da clima uffiziala saja fin ussa restada lunsch davos quai che saja necessari. L’ultim rapport dal cussegl dal clima mundial haja mussà ch’il stgaudament dal clima da passa 1,5 grads haja consequenzas gravantas. Il svanir dals glatschers saja ina da las consequenzas las pli visiblas tar la midada dal clima. En las regiuns da las Alps s’augmentia la temperatura radund dubel uschè spert sco en la media globala. Glatschers e la schelira permanenta en regiuns autas contribueschian a la stabilitad da costas da muntognas che possian daventar instabilas. Sco exempel vegn numnà il Piz Cengalo sur Bondo dal qual èn sa distatgads ils 2017 radund trais milliuns meters cubic grippa e crappa. Vegnida lantschada è l’iniziativa da l’Uniun independenta per la protecziun dal clima che dumbra radund 2000 commembers. En il comité èn però er represchentads scienziads e represchentants da la politica da quasi tut las partidas ed organisaziuns da la natira e la protecziun dal clima.