Falera e ses products

(anr/abc) Igl atun vargau ei la radunonza communala da Falera s’occupada l’emprema gada dalla caussa «Chinginas». Vendergis vargau ein igl areal da skis pils affons ed igl observatori Mirasteilas puspei stai en discussiun. La suprastonza ha priu notizia dallas opiniuns dils convischins. La vischnaunca da Falera s’auda tier las beinstontas dil Grischun. Ensemen cun Flem e Laax fuorma ella la destinaziun che seprofilescha adina puspei cun innovaziuns turisticas. «Da nuot vegn nuot» ei la devisa en tuttas treis vischnauncas, perquei ston ellas era dar peisa da mantener l’infrastructura ed optimar quella. Ozilgi sa il maun public buca mo lubir projects e mirar co investurs privats promovan e sviluppeschan il turissem. Evidentamein sto ina vischnaunca turistica impunder oz ina buna part dallas taglias e taxas en quei sectur. Ella sto sezza vegnir activa, dar il stausch, sviluppar projects ed investir en quels. Che quei va buca senza discussiuns politicas muossan ils exempels actuals a Flem e Laax. Igl access sil Fil da Cassons ed il center da sport Prau la Selva a Flem, la senda da tschemas e la sanaziun dil bogn cuvretg a Laax s’audan tier la strategia, caschunan denton contraversas ed ein sfidas per las autoritads. E co eis ei ella pintga dallas treis partenarias, la vischnaunca da Falera?

Dus menaschis a Chinginas

En medem senn ei la radunonza communala da Falera s’occupada vendergis sera cun quella tematica. La suprastonza ha vuliu discutar surlunder culla populaziun. Aposta per quei motiv ha ella tractandau avon la radunonza da calonda mars duas caussas che pertuccan la strategia turistica. Ina da quellas, la «Aventura Chinginas» haveva la radunonza gia discutau ils 23 d’october. Lu ha Andreas Bärtsch, meinagestiun e partenari dalla firma Quant SA, presentau ina pusseivladad co la vischnaunca da Falera savess migliurar la situaziun digl areal Chinginas sur il vitg.

Leu ein duas purschidas ed attracziuns turisticas. Inagada ei quei la pista e scoletta da skis cun runals ed attracziuns pils affons. Pils hosps da Falera cun affons pigns eis ei ina zona idillica appreziada. El medem liug ei igl observatori Mirasteilas. L’ustria el plaunsut dil baghetg partan ils dus menaschis. La situaziun ei buc optimala, basegns e necessitads denter paradis d’affons ed observatori divergeschan pulitamein. Perquei ha la suprastonza tratg en consideraziu da sligiar il problem. Bärtsch ha proponiu d’installar in Quadrin. En vesta fuss ei stau d’installar ina tala casa modulara dalla firma Uffer da Savognin gia sigl unviern 2018/19. La radunonza communala haveva denton giavischau che la suprastonza surlavuri il project e ch’ella presenti ulteriuras pusseivladads a Chinginas.

Quei ha ella fatg vendergis sera. En tut ein quater variantas stadas en discussiun. Ina ei quella da spitgar daferton, schar la situaziun sco ella seigi. Ord il ravugl dils presents han ins udiu e sentiu che negin vul quei. La secunda varianta ei quella da baghegiar ora igl observatori Mirasteilas cun sia ustria e cunquei sligiar il problem logistic.

La tiarza varianta ei quella d’installar il Quadrin. Il «container» per diever gastronomic ei in provisori d’aulta qualitad, el seschass dislocar senza difficultads suenter ch’ins havess anflau autras sligiaziuns pigl areal da skis dils affons. Sco quarta varianta ha la suprastonza presentau la proposta d’in baghetg niev aposta per la scola da skis.

Teleferica e hotel

Il president communal Wendelin Casutt ha aviert ina discussiun objectiva. Per contonscher ina sligiaziun che cuntenta tuts vegn la suprastonza communala a luvrar vinavon cun ina cumissiun. Quella duei secumponer da tuttas gruppas d’interess dalla vischnaunca turistica. Ord la discussiun ein duas variantas favoritas sortidas, numnadamein quella da baghegiar ora il baghetg existent digl observatori Mirasteilas e quella d’installar in Quadrin modular.

La vischnaunca da Falera ei pilver en ina situaziun da partenza en divers risguards. La gruppa Arena Alva SA sto remplazzar ils proxims onns la sutgera Falera–Curnius ch’ins haveva baghegiau entadem il vitg. Il CEO Reto Gurtner ha lantschau ina discussiun cun ina teleferica nova oradem il vitg. Vitier quella damonda strategica vegn il project d’in hotel niev. Il president communal ha informau ch’igl architect Gion A. Caminada seigi vinavon interessaus da projectar quel all’entrada dil vitg. Suenter che la vischnaunca da Falera ha buca pli contact culla firma Steiner SA ei denton aunc negin investur niev en vesta.

Sper la discussiun tier la tractanda informativa «Chinginas» ha la radunonza communala aunc approbau in credit da 105 000 francs per lavurs vid las vias da meglieraziun igl onn current. Naven digl onn 2020 vegn la vischnaunca da Falera a saver optimar l’entira reit da vias da meglieraziun.

Ei setracta d’in project che vegn realisaus enteifer diesch onns, las vias survegnan novs spisgials da metal ed en loghens teis sdremas da betun. Avon 20 onns han ins finiu la meglieraziun da funs a Falera.