«Noss hotels san raquintar istorgias»

DA GION NUTEGN STGIER / ANR

En il center da la radunanza da delegads 2019 è stà il giubileum da 100 onns da l’uniun che reunescha ils hoteliers grischuns. Ils affars statutarics èn per ina giada stads secundars. Festivà è vegni cun blera prominenza, chant, teater e pleds. En rotscha è la prominenza grischuna vegnida a l’occurrenza da giubileum a la Scola da turissem e hotellaria a Passugg. Bunamain tut la societad illustra da noss chantun era preschenta ed ha fatg in viva sin il giubileum tschientenar. La preschientscha dals represchentants e da las represchentantas da l’economia, dal turissem, da la politica e da la cultura ha testifitgà che la hotellaria è per il Grischun tuttina da gronda impurtanza.

Fatgs omnipreschents

En moda plain umor e tuttina cun ina tscherta seriusadad han Ernst Wyrsch, da preschent il pli aut hotelier grischun, e Jürg Domenig, il mainagestiun da l’uniun giubilara, manà la radunanza da delegads ch’è daventada ina cumbinaziun da pleds, chant e teater. Las forzas da damaun en la hotellaria han lura er contribuì bler a la festa da 100 onns Hotelleriesuisse Grischun. Intginas persunas han lura er gratulà a la giubilara, saja quai al lieu ubain en moda digitala. Tema central è pero stà il giubileum da 100 onns e lura il futur da la hotellaria. La digitalisaziun, l’innovaziun, la flexibilitad e l’investiziun sajan per l’avegnir da la hotellaria fatgs omnipreschents, ha ditg Wyrsch.

Quai avain be nus

Tranter la blera prominenza envidada era er Andreas Züllig, il president da Hotelleriesuisse. El è sez er stà parsura dals hoteliers grischuns e dapi il 2014 è el al timun da l’associaziun da hoteliers svizra. Züllig ha discurrì d’in’auta qualitad da la hotellaria grischuna. Ils giasts sajan bler pli cuntents che quai ch’il maletg da la hotellaria haja en la publicitad. Donn saja bain che gist las medias rapportian adina plitost negativ da la gastronomia ed hotallaria svizra, laudan persuenter quella da l’Austria e dal Tirol dal sid. Züllig, el ha ditg che blers da noss hotels sajan instituziuns, chasas cun ina gronda, interessanta e lunga istorgia. Istorgia n’haja la hotellaria en l’Austria ed er en il Tirol dal sid nagina. En l’avegnir saja da raquintar anc dapli da quellas istorgias dals hotels, quai veglia il giast sentir e vesair adina dapli, ha punctuà il president da Hotelleriesuisse. Gist quellas istorgias sajan ina singularitad ed existian per part gia 150 onns cun esser stads noss hoteliers da lez temps vairs pioniers. En general era l’ambianza tar la festa da giubileum dals hoteliers grischuns fitg buna. Quai er cun l’uniun preschentar grazia a l’ensemble vocal Incantanti sut la direcziun da Christian Klucker in program lateral plain aventuras canticas e cabarettisticas. Da buna luna eran ils hoteliers da noss chantun er cun avair gì fin uss ina buna stagiun. Naiv saja avant maun, da far haja simplamain bell’aura, è vegnì ditg. In hotelier da vaglia è Kurt Baumgartner, el che maina a Scuol intgins hotels e da preschent l’hotelier svizzer da l’onn. El ha ditg ch’ils emprims 15 dis dal favrer manchin in pau ils giasts. Suenter per bunamain in mais saja lura propi stagiun auta. Pasca saja quest onn pulit tard e quai haja er in’influenza sin il temp da vacanzas. Tut en tut eran ils hoteliers però cuntents cun avair gì in bun onn da fatschenta cun 4,2% daplis giasts e var tschintg milliuns pernottaziuns.