Roschadas al timun «Südostschweiz»

Tar la gasetta «Südostschweiz» datti midadas: Il viceschefredactur da fin uss Tom Senn è il nov schefredactur da la gasetta quotidiana. Senn succeda cunquai a Martina Fehr ch’era fin uss la schefredactura e responsabla publicistica è da nov manadra publicistica e responsabla per realisar la convergenza da radio, televisiun ed online sco er da las gasettas cun il titel Südostschweiz. Nov viceschefredactur è Olivier Berger.

Il Grischun Livio Bieler è campiun svizzer da passlung. Ad Engelberg gudogna il giuven da Panaduz ils 15 kilomters persecuziun, 46 secundas avant Cédric Steiner da Tavau. Il Sursilvan Toni Livers ch’è vegnì sonda campiun svizzer sur ils 10 kilometers skating sto sa cuntentar cun il quart plaz.

Il parc d’urs ad Arosa ha dus novs abitants, Meimo ed Amelia. Ils dus urs da l’Albania èn arrivads venderdi en il parc. Ils animals eran avant serrads en en in pitschen zoo d’ina ustaria sin 60 meters quadrat. Ils dus urs spetga ad Arosa in parc cun ina grondezza da trais hectaras. En il parc viva gia Napa, in anteriur urs da circus or da la Serbia. Per evitar conflicts vegnian ils trais urs separads in da l’auter.