Nov disc cumpact cun canzùns da Dolf

(cp) Igl on passo vess Benedetg Dolf cumplanieu igl sieus 100avel natalezi. Par saragurdar dad el ân igls tres cors da la Mantogna ad egn ensembel da tgànt registro egn disc cumpact cun canzùns or digl grànd a faszinànt stgazi da cumposiziùns da Dolf. Igl on passo vevani anvido igl cor viril, igls dus cors maschados da la Mantogna, ad egn quartet da tgànt, tuts sut la direcziùn da Lisa Lanicca, ad egn conzert cuminevel c’â gieu liac a Tusàn. Sper texts dad Alfred Huggenberger a Martin Schmid e’gl surtut vagnieu canto, par part par l’amprem’eada, canzùns cun texts da la poetessa da Dagliegn Anna Capadrutt agl idiom da Preaz cun sieus tipic tient. Benedetg Dolf capeva exzelentameing da dar egna furma musicala agl caracter tipic da mintga lungatg.

Lez conzert veva incanto tànt igls cantadurs sco ear igl auditurs c’igl e vagnieu exprimieu igl giavisch da registrar que tgànt impressiunànt sen egn disc cumpact.

Igl ancunaschider profund da las ovras da Benedetg Dolf, Luzius Hassler, ad igl ancunaschaint moderatur digl Radio Rumantsch, Giusep Giuanin Decurtins, ân alura inizieu que project. Seglsuainter e’gl vagnieu registro que program da canzùns da Benedetg Dolf an la baselgia da Sarn cun Andy Reich sco inschignier digl tùn. Dantànt e’l pront igl product a po vagnir preschanto a la publizitad. Quegl fan igls cors involvieus a caschùn d’egn conzert da batesem cuminevel.

Par festivar igl ple nov disc cumpact cun canzùns da Benedetg Dolf e la populaziùn anvidada an la tgea da scola a Flerda noua c’igl vean canto egn beal matg da quellas canzùns ca satgatan segl disc.

Igl batesem da quel â liac vendergis, igls 15 da favrer 2019 a las uras 20.00 an sala polivalenta da Flerda.