Specialitads dil Vallatscha

(anr/hh) Il Vallatscha a Curaglia ei buca mo enconuschents per sia excellenta cuschina. Ussa san ins era retrer dil restaurant differentas specialitads fatgas leu. Dapi rodund dus meins ei il restaurant e hotel Vallatscha a Curaglia en Val Medel sut nova direcziun. Sonja Schlegel e siu team han dau niev slontsch alla casa ch’ei vegnida renovada cumpleinamein avon entgins onns. Sper in bellezia restaurant cun pliras salas porscha il menaschi era in tschuppel letgs. La cuschina cun siu cau Andreas Kuppinger ei fetg innovativa, la carta da spisas ei vegnida adattada successivamein las davosas jamnas.

Sper las spisas tradiziunalas dalla regiun porscha il Vallatscha era entginas specialitads cun carn indigena, denter auter carn ansiel. Sin la gliesta da menus anfl’ins il mument denton era in sortiment da burgers cun carn ni caschiel. La carta vegn dil reminent adattada successivamein, era tenor purschida da products regiunals e stagiunals. Mo buca mo quei: La cuschina porscha era products che san vegnir cumprai el restaurant ni retratgs sin empustaziun (info@vallatscha.com).

Ei setracta da paun cun carn piertg e differentas sorts da pasta fatga a maun e cun cuntegn da products per part dalla regiun. La pasta vegn fatga cun ina frina speciala. Il Vallatscha producescha denton era pralinas cun different cuntegn, denter auter Röteli, Baileys ni Cafe Lutz. Ina viseta el restaurant Vallatscha a Curaglia sepaga pia en mintga cass.

Ulteriuras informaziuns: www.vallatscha.com