Ervina fa patlaunas

Da Claudia Cadruvi / ANR

Ella è ina cuschiniera passiunada, gliez remartgan ins immediat sch’Ervina Bernet-Hendry raquinta da las tschaveras ruffinadas ch’ella prepara per sia famiglia. Dacurt ha ella puspè ina giada prendì nanavant il recept da patlaunas da sia mamma. En sia cuschina sulegliva a Gommiswald ha l’anr dastgà observar co ch’Ervina fa questa pastizaria da tschaiver. Suenter la lavur dastga la schurnalista gist anc star a marenda. Da la gronda mantunada na vanza gnanc ina solia patlauna. Ma entschavain a l’entschatta.

Figl ha da narr gugent patlaunas

Ervina ha gia semtgà tut cura che la schurnalista arriva. Sin maisa-cuschina è avert il pitschen ordinatur en il qual ella aveva rimnà da giuvna ses recepts preferids – era quel da patlaunas da la mamma scrit giu cun maschina fin e schuber. Per far questa spezialitad dovri atgnamain mo simplas ingredienzas: farina, latg, ovs, pischada ed ina presa sal. La pischada ha Ervina prendì ad uras ord frestgera. La pischada è pia lomma e sa maschaida immediat cun la farina ed ils ovs cura ch’Ervina entschaiva a truschar e stagnar la pasta cun ils mauns.

Patlaunas devi pli baud tar la famiglia Hendry a Sedrun sa chapescha mo durant il temp da tschaiver. La mamma dad Ervina fascheva las patlaunas per il solit cura ch’ils uffants n’eran betg denturn – probabel pervi da l’ieli chaud, da lez avevan las mammas in stoda respect e na levan betg ch’uffants sautian enturn la chazzetta cun ieli buglient.

Dapi ch’Ervina è maridada abitescha ella en il chantun Son Gagl. Sia favella tuatschina n’ha ella mai pers. Las patlaunas tenor il recept da la mamma n’ha ella dentant betg pli fatg uschè savens ils ultims onns. Ma uss ch’in da ses dus mats ha uschè da narr gugent patlaunas caztgi puspè da far.

Stender sur la schanuglia

Cura ch’Ervina prenda la pasta ord la stgadella resta enavos gnanc ina mieula – exact sco quai ch’ella ha emprendì a sias uras en la scola da puras a Glion. Cun inschign e senza ch’i dess ina rusnicla zulla ella ora la pasta sin la platta da granit. «Ins sto zullar fin ch’ins vesa il muster dal granit atras la pasta», explitgescha Ervina ed agiunta tranter spass e da tschert: «Jau na stend uss betg la pasta sur mia schanuglia.» Pli baud schevan ins numnadamain ch’ins stoppia far gliez. Ervina suppona che las masseras da pli baud n’avevan naginas zullas. Sia mamma faschevia per exempel ora la pasta cun ina butteglia. Per che la pasta daventia tuttina satiglia avunda stendevan ins ella halt anc sur schanuglia.

Briclas e plimatschs

L’ieli da flur-sulegl en la chazzetta è uss chaud avunda e la pasta tagliada en sdremas fiss era pronta. Bufatg bogna Ervina l’emprima sdrima en l’ieli e la patlauna sauta levet en las borlas da l’ieli. Sin la patlauna sa furman pitschnas briclas. «Jau hai pli gugent sch’i fa plumatschs», di Ervina. E pren mira, la proxima patlauna sa scufla si en l’ieli ch’ella daventa radunda sco in plimatsch pulpì.

Cun in pitschen lain volva la cuschiniera las patlaunas en l’ieli per ch’ellas survegnian dad omaduas varts la tipica colur melna. Suenter gnanc duas minutas pestga Ervina las patlaunas cun in chaz furà ord la chazzetta e caveglia ellas sin in plech cun palpiri da cuschina. Sco che las patlaunas èn sfradentadas pon ins springir pulvra da zutger surenvi.

Da far patlaunas ha cuzzà ina bun’ura. Uss datti marenda en stiva. Suenter in’uretta è la bella mantunada da patlaunas stulida. Il buntad gust resta dentant anc ditg en bucca e regorda a temps che tattas, ondas e masseras stendevan la pasta da patlaunas sur la schanuglia giu.