Gaudi era sin loipa cuorta

(anr/gv) Dapi treis onns preparan amitgs da cuorsa liunga sur il vitg da Siat entuorn il plaz da ballapei ina loipa da strusch in kilometer. Gia igl emprem onn ha Giusep Blumenthal da Ladir organisau in cuors da cuorsa liunga silla loipa tratga cun in skibob ed entuorn 20 umens e dunnas ein suandai siu invit. Quest unviern separticipeschan 40 persunas al cuors dil scolast da cuorsa liunga. Arno Spescha e Simon Casanova ein ils iniziants dalla loipa da Siat. Arno Spescha: «Avon quater onns havevan nus cheu a Siat avunda neiv per trer ina loipa. Muort munconza da neiv a Trun ed a Sagogn mavan nus tochen a Sedrun per far cuorsa liunga.» La Pro Siat ha susteniu l’intenziun dils dus giuvens iniziants ed ils dus onns proxims ha in skibob tratg ina cuorta loipa sur il vitg. Quella loipa illuminada ei allura era vegnida nezegiada stediamein e dapi quest unviern tila ina maschina da pista cumprada d’occasiun la loipa semtgada per skating.

Blumenthal dat sco sulet il cuors. Avon siat onns ei il pedagog al Luvratori Surselva (Argo) seformaus tier scolast da cuorsa liunga. Gia sco engaschau tiradur ha el experientscha ell’instrucziun da sport. La sonda vargada ha el instruiu en duas lecziuns avonmiezdi e duas lecziuns il suentermiezdi. Mintga participont absolva el decuors digl unviern quater lecziuns en gruppas da diesch persunas. Commembers dalla Pro Siat dattan sustegn sustegn logistic. Gregor Cavigelli, igl anteriur president communal e currider passiunau, ha purtau la sonda il punsch da pausa. Sonda proxima separticipeschan 19 participonts dil cuors a Siat al Nordic Culinaric cun partenza ed arrivada a Trun.