Jau hai num Valle

DA GION NUTEGN STGIER / ANR

Mintga occurrenza pli gronda da sport, sajan quai Campiunadis mundials da ballape ubain hockey, Maestranzas mundialas d’atletica leva e lura er Campiunadis mundials da skis han lur mascottin. Valle sa numna quel dad Åre. Ils mascottins èn figuras ch’èn il pli amiaivlas e savens èn ellas in animalet simpatic e charin. Il mascottin dals Campiunadis mundials da skis ad Åre n’è lura nagin animalet, mabain in um da naiv. El sa numna Valle ed ad Åre è el omnipreschent. Durant il di è l’um da naiv sin las pistas en vischinanza dals fans e la saira visita el schizunt er las bars e las discotecas. Valle è uschia il successur da Moritz, la mascotta da San Murezzan 2017 che n’era nagut auter ch’in capricorn, bunamain uschè popular sco il sulegl da San Murezzan.

Hopsi, Ga e Pa

Tar ils davos Campiunadis mundials da skis a San Murezzan è Moritz en curt temp daventà in star. Quai vul bain er Valle, el che n’è anc betg uschè enconuschent sco Moritz. Bunamain gia en emblidanza èn ils dus mascottins dals Campiunadis mundials da skis 2015 a Vail/Beaver Creek, il liun Pete e l’urset Earl. Dus onns avant han las Maestranzas mundialas da skis gì lieu a Schladming. La mascotta da quell’occurrenza aveva num Hopsi ed era ina lieur charina e bellina. Las duas minas da naiv cun il num Ga e Pa eran il mascottin dals Campiunadis mundials da skis ch’èn stads il 2011 a Garmisch Partenkirchen. Las proximas duas emnas attira però Valle la simpatia da blers fans, uschia che a Moritz, Hopsi ed a Ga e Pa resta pauc auter che da tegnair ils poleschs per ils teams da la Svizra, l’Austria e la Germania.