Medem luf a Son Gagl ed en Engiadina

L’analisa genetica da l’Universitad da Losanna ha mussà ch’il luf M93 ha stgarpà las nursas ad Oberriet en il Son Gagl. Quai è il medem luf ch’ha era gia stgarpà nursas en l’Engiadina, ha communitgà la chanzlia chantunala da Son Gagl. Il luf M93 era vegnì registrà l’emprima giada en l’Engiadin’Ota suenter ch’el aveva stgarpà intginas nursas. La fin november 2018 è el lura vegnì a Berg en la Turgovia nua ch’el ha puspè stgarpà pliras nursas. Mez december è el lura stà ad Oberriet en il Son Gagl, là ha el mazzà duas nursas. Tar las nursas stgarpadas a Muolen en il chantun Son Gagl n’han ins betg pudì determinar l’animal. Il sa cuntegnair sumegliant lascha dentant supponer ch’era quai saja stà il luf M93. L’onn passà n’hai dà durant la stad betg in sulet animal da niz che fiss vegnì stgarpà dal luf.

Questa giada ha l’Engiadin’Ota survegnì la gronda naiv nova. La via tranter Segl e Malögia è perquai stada serrada per dus dis e mez pervi dal privel da lavinas – e quai betg per l’emprima giada quest onn. Las lavurs da rumida èn stadas intensivas – ils impiegads da l’uffizi da construcziun bassa han lavurà cun maschinas grondas per allontanar la naiv da las tschintg lavinas ch’han gì bloccà la via chantunala tranter Segl e Malögia. Il schef dal district 3 da l’uffizi da construcziun bassa, Jan Kamm, ha decis da laschar serrada la via sur la fin d’emna. Emprima prioritad ha la segirezza. Las differentas occurrenzas en Engiadina u er ils cunfinaris, che dovran questa via mintga di, muntan in squitsch per il responsabel. Sia decisiun n’influenzeschan quels dentant betg. Ils plans per ina soluziun tranter Segl Föglias e Malögia èn la stad passada vegnids suspendids da la politica a Cuira. Prioritad duess tenor els survegnir il toc tranter Segl e Silvaplauna.