«Igl affon ei da natira marviglius»

CUN ANNA MARIA GENELIN 
HA SUSI ROTHMUND / ANR DISCURRIU

Anna Maria Genelin ei oriunda d’Acletta ed habitescha dapi igl avrel 2018 a Spligia. Leu lavura ella el sectur da turissem ed ei responsabla per las finanzas. La dunna da 49 onns ei in tip che va tras la veta cun bien humor, pren denton buc encunter tut las caussas senza analisar a moda critica. Ell’ei in tip ventireivel che mira plein optimissem egl avegnir. Duront siu temps liber va Genelin bugen a saltar ed ella ha ina pissiun pil teater e la musica. Cun plascher tuorna ell’adina puspei ella patria. Il moviment ella natira ei per ella fetg impurtonts.


Bien di co vai – essas cuntenza?

Gie, jeu tratgel adina puspei: Con bien ch’jeu hai atgnamein. Era sch’ei dat enqualga sfidas ella veta. Sch’jeu mirel sin autras historias da veta hai jeu grond cletg.

Tgei vegn endamen igl emprem en connex cun Vossa affonza?

En mia affonza ha ei dau bials ed el medem mument meins bials temps. Jeu vi denton seconcentrar sils bials temps. Gliez ei definitiv ils temps cura ch’jeu savevel ir cun miu bab en nuegl sco era visitar las alps la stad. Era dils temps che nus fagevan fein si mises hai jeu bialas regurdientschas. Per quels temps laschel jeu encrescher ed era per miu bab.

Sche Vus savesses midar enzatgei sin quest mund, tgei fuss quei?

Per exempel il sistem da scola. Igl affon ei da natira marviglius, mo quella marveglia vegn enqualga disfatga aschiprest ch’igl affon va a scola. Ei vegn trenau da star eri ed il temprament individual dils affons vegn mo memia savens stinschentaus. Ei vegn sviluppau victurs e sperdiders e quei ei in plaun fritgeivel per scuidonza e mobbing. Ei capeta che las individualitads dils affons vegnan ignoradas. Ei mauncan roms che rinforzeschan la persunalitad e promovan la valur da mintga singul affon. Il pensum dils scolasts ei segir buca sempels. Tonaton savessen els far diever dapli da lur influenza en favur digl affon.

Buca diltut 100…

… la damonda ei mo, 100 da tgei? Forsa 100 da quei che la massa viva, da quei che la massa ha perschuasiuns ed influenzas. Na, jeu emprovel dad esser 100 da memezza.

Tgei duvrass nies mund buc?

Sil mund duvrass ei negina tema. Sco ella historia dat ei era oz imperis; per exempel la farmacia. Leu dat ei persunas che lavuran culla tema dalla glieud per manipular e contonscher lur finamiras sco pussonza e daners. E quei, cun grond success.

Tgei duvrass nies mund?

Curascha e responsabladad per sesez per scadin da nus per realisar giavischs individuals e viver las atgnas perschuasiuns.

Tgei fa sevilentar Vus?

Ei fa vegnir mei narra sch’jeu vesel ch’ei vegn sfarlatau daners per perscrutaziuns banalas. Denton, in remiedi per medegar il cancer duess ei buca dar. Pazients che piteschan dils tractaments agressivs han tema e battan per lur veta. Da miu avis vegn la dignitad dil carstgaun blessada massivamein. Tgei, sche medegar quella malsogna fuss pli sempel e human che quei ch’ei vegn dau da crer…?

Essas Vus dependenta dil telefonin? Dalla televisiun? Dil computer?

Il computer sco il telefonin ein mes instruments da lavur. Pia, gie absolutamein dependenta.

In’jamna senza electricitad fuss…

… in interessant experiment.

Per tgei essas il pli engrazieivla?

Per las scuntradas en mia veta cun persunas che vivan a moda autentica, sincera e cun respect enviers il concarstgaun.

Pregiudezis…

… degradeschan il concarstgaun. Jeu crei che mintgin da nus hagi pregiudezis perquei che tals ein savens nuncunscients. Era jeu.

In proverbi di: «Gronda bahaultscha, pauc ella caultscha.»

Cheu patratgel jeu vid talas persunas che tschontschan e tschontschan senza fin e misericordia per la finfinala tuttina haver detg nuot.

Cu e daco haveis Vus bargiu la davosa ga?

Cura che nies giat ei morts.

Cu e daco haveis Vus giu risadas la davosa ga?

Dacuort el teater a Spligia. Cura ch’ina actura giugava sia rolla humoristica cun in tal gust ch’jeu havevel il cramf dil rir.

Tgei ei humor?

Humor ei la moda e maniera da prender pli lev la veta.

Tgei ei carezia?

Carezia ei sch’ins lai il concarstgaun aschia sco el ei manegiaus.

Tgei muntada ha la religiun per Vus?

La religiun… ni la cardientscha 
dat forza e rispostas a mi en certas 
situaziuns.

Esser Romontschs ei…

… mintgaton sco dad esser in unicat.

Tgei giavischs haveis Vus pil futur?

Che, sco emprem pass, la relaziun denter ils carstgauns hagi dapli caracter da respect e beinvulientscha.

Ed ussa, co va ei vinavon ella veta?

Jeu vegnel vinavon ad esser fideivla a memezza e realiar mias ideas e siemis.