La fracziun da la pbd vul 
sbassar las grevezzas fiscalas

(cp) Per preparar la sessiun dal favrer dal cussegl grond è sa radunada la fracziùn da la pbd la mesemna passada a Vargistagn. En preschientscha da cusseglier guvernativ Jon Domenic Parolini è stada el center da la radunanza la revisiun parziala da la lescha da taglia grischuna e la lescha davart las taglias da vischnancas e da baselgias (taglias sin iertas e donaziuns).

Plinavant ha la fracziun da la pbd examinà d’inoltrar in’incumbensa a la regenza perquai ch’ella è preoccupada pervia da las prestaziuns da l’uniun Cussegliaziun per uffants e giuvenils (gidar, accumpagnar, sustegnair) surtut quai che pertutga la cussegliaziun da mammas e babs.

En sia predeliberaziun da la sessiun dal favrer, salvada en Val Schons, è sa deditgada la fracziun da la pbd da la revisiun parziala da la lescha da taglias dal chantun Grischun e da la lescha da las taglias da vischnancas e baselgias (taglias sin iertas e donaziuns).

La pbd dal Grischun s’engascha per sbassar las grevezzas fiscalas a reguard las taglias sin iertas. Plinavant propona ella da midar il sistem pertutgant las taglias sin iertas en favur da taglias sin donaziuns.

En vista a la finanziaziun equilibrada dal chantun refusa la fracziun da la pbd da dismetter dal tuttafatg las taglias sin iertas e propona levgiaments che surpassan las propostas da la regenza, preschentadas en sia missiva.

La pbd è cuntenta cun la resposta da la regenza che sustegna l’incumbensa dal deputà Ursin Widmer che pretenda da simplifitgar il proceder pertutgant las elecziuns chantunalas e naziunalas. Da l’autra vart è ella malcuntenta cun la resposta da la regenza a la dumonda da fracziun, inoltrada da deputà Urs Hardegger.

Cun sia dumonda leva la fracziun obtegnair ina posiziun concreta da la regenza pertutgant il material da communicaziun per la pressa davart la decisiun da la Weko «Engiadina I». «A la regenza èsi bain anc da far insaquantas dumondas durant la debatta», manegia il parsura da la fracziun Gian Michael.

Incumbensa da fracziun per visar tut ils mandats da la Cussegliaziun per uffants e giuvenils pertutgant la cussegliaziun da mammas e babs

L’uniun Cussegliaziun per uffants e giuvenils (gidar, accumpagnar, sustegnair uffants e giuvenils) è veginda incumbensada cun in mandat da prestaziun da cussegliar mammas e babs en il chantun Grischun. Sin fundament da problems en connex cun il dretg da lavur, mancanzas da cumpetenzas socialas e professiunalas è la lavur da quest’uniun inquietanta e la qualitad da las mesiras a favur da la cussegliaziun e prevenziun sanitara per l’entir Grischun è dubitaivla. Per quest motiv examinescha la fracziun da la pbd d’inoltrar in’incumbensa a la regenza cun la pretensiun da visar tut ils mandats da l’uniun Cussegliaziun per uffants e giuvenils a reguard la cussegliaziun da mammas e babs. La radunanza da la fracziun è vegnida terminada cun il pled da salid dal president communal da Vargistagn Marco Dolf e la presentaziun dal Parc Natiral Bavregn entras ses manader Remo Kellenberger.