Uniun «Favogn Surses» vul procurar per dapli vita en Val

Il Surses è ina Val durmentada. Da quest avis è ina nova uniun ch’è vegnida fundada avant curt a Savognin. L’uniun «Favogn Surses» vul ussa dasdar la Val or da la sien: Sia finamira è ch’ir en sortida en la Val duess puspè daventar pli attractiv. Il mument dumbra l’uniun radund 30 commembers. Ins veglia organisar regularmain eveniments en la Val, sche pussaivel mintga duas emnas in. Quai ha ditg Adrian Ballat, il president da l’uniun Favogn Surses. Ins na veglia betg esser ina concurrenza per las autras uniuns da la Val ed era betg concurrenzar las uniuns da giuventetgna. Ins veglia simplamain porscher a la glieud ed als turists pussaivladads da far festa fin la damaun baud. Il mument saja il pli tard l’ina da notg finì causa ch’i na dettia nagina discoteca pli en la Val, uschia Ballat. A lunga vista po l’uniun schizunt s’imaginar dad avair ina giada in’atgna bar. Ma la fin finala dependia quai adina dals commembers, tge ideas che quels hajan, e quant activs ch’els sajan, resumescha il president.

La bieraria «Feldschlösschen» ha producì e vendì l’onn passà dapli biera che anc l’onn avant. Popularas èn stadas cunzunt bieras senza alcohol, là munta l’augment a 15 pertschient. Surproporziunal ha Feldschlösschen er vendì en il sectur da bieras spezialas, sco la bieraria communitgescha. Tar questa sparta tutgan las marcas sco Valaisanne, Brooklyn e Grimbergen. Il medem mument haja la bieraria er augmentà la svieuta per 2%, tuttina fitg sco quai ch’il martgà da bieraria svizzer è creschì. Era tar la vendita online è la svieuta creschida l’onn passà. Feldschlösschen tutga tar la gruppa danaisa Carlsberg.