Uniuns ella plievgia

dad augustin beeli / anr

Suenter la restructuraziun politica suonda els vitgs quella el secuntener social. Pli e pli biars vulan viver individual e buca pli s’engaschar en uniuns. Quei sentan chors e musicas. Ei seigi vegniu terribel ruasseivel el vitg, audan ins trasora e dapertut. En biars vitgs sesprovan las uniuns da mantener quei ch’ei aunc activ e vital. Chors, musicas ed uniuns da dunnas sentan il meglier il puls dalla populaziun. Novas cantaduras e novs cantadurs dat ei strusch, ellas musicas eis ei era grev da motivar giuvenils. Gia all’entschatta dils onns navonta han ins s’encurschiu ellas musicas ch’igl ei impurtont da promover la giuventetgna. Per quei motiv han musicants iniziativs fundau en Surselva la Brass Band Sursilvana. Quella ei daditg buca pli «mo» sursilvana. La situaziun sa vegnir grevionta sche dirigentas ni dirigents calan. Per reglar la successiun drova ei sforzs extraordinaris. En quella situaziun vegn ussa la Societad da musica Danis-Tavanasa. Igl onn 2020 sa ella festivar siu giubileum da 100 onns. Il president districtual Ivan Vinzens beneventa e lauda co la Societad da musica Danis-Tavanasa planisescha actualmein siu avegnir. «Igl ei in agir exemplaric», declara el. Era la Societad da musica Sumvitg-Cumpadials ei activa. Ella commemorescha il 2020 siu 125avel anniversari ed igl ei planisau da festivar quei scosauda.

Pagina 3