Buna emprima mesadad da stagiun per pendicularas

Durant l’emprima mesadad da la stagiun han las pendicularas svizras pudì profitar da bunas cundiziuns d’enviern. Fin la fin schaner han las pendicularas notà 10,4% dapli giasts ed 8,2% dapli svieuta tar ils transports da persunas. Quai cumpareglià cun la media dals ultims tschintg onns. Fin la fin schaner hajan ins gì 1,7% dapli giasts cumpareglià cun l’onn avant. Tar ils transports hajan ins fatg 3,4% dapli svieuta. Contribuì al resultat positiv hajan sur tut ils dus chantuns Vallais e Grischun ch’èn ils pli gronds chantuns en il turissem d’enviern. La part sura da Berna e las regiuns en las Prealps hajan in zic mendras cifras che l’onn passà. Quai perquai ch’els hajan pudì cumenzar quest onn pli tard cun il manaschi. Er sche la stagiun d’enviern na saja anc betg a fin sajan las pendicularas svizras plain speranza.

Mattas fin 16 onns pon s’annunziar tar il project «Swiss TecLadies». Quel vegn organisà da l’Academia svizra da las scienzas tecnicas SATW. Cun quest project vulan ils organisaturs promover mattas en mastergns da Mint (matematica, informatica, scienzas natiralas e tecnica). Per s’annunziar fan las mattas in curt test online. Sch’ellas han success en quel survegnan ellas ina mentura persunala. Las menturas èn tuttas scienziadas e lavuran era sin in champ tecnic. Cun ellas po mintga participanta lura decider ses program sez. D’ina vart mussan las menturas lur mastergn, da l’autra vart han ellas er ils contacts per pudair dar envista en autras lavurs. Vinavant dessan las scienzadas era dar curaschi a las mattas ed avair ina sort «funcziun d’exempel». Duas da las total 45 menturas èn da la HTW Cuira. Las mattas ch’èn tar ellas duas èn 13 e 16 onns veglias. Tenor ellas hajan ellas vesì ina pluna fassettas da differentas professiuns tecnicas.