Igl «auto da cult» 
cun fatscha nova

Quella marca s’auda tier las empremas ch’han construiu autos robusts. In da quels ei il Toyota RAV. A Glion presenta la garascha Aldo Beeli il model reschniev. Ils models «Landcruiser» s’audan tier ils pli populars ellas tiaras da svilup. Leu nua ch’ins sto carrar sin pistas, el desiert, tras la buglia ellas Tropas e nua ch’ei va buca senza vehichel robust, vesan ins adina in auto dalla marca Toyota. In Hilux, in Landcruiser s’audan tiel standard sch’ins sto dumignar cundiziuns miserablas. La marca Toyota seprofilescha dapi 40 onns cun tals models. Era il model RAV s’auda tiels robusts e pratics. Ils davos 15 onns ha Toyota adina puspei migliurau quei «jeep» campester ch’ei adattaus per aventuras e muntognas. La tracziun 4×4 ei standard. La garascha Aldo Beeli SA a Glion fa dapi onns oreifras experientschas cul RAV. El ei semplamein nunpretensius, ferms e robusts. Ils adherents da quei auto han denton constatau ch’el ei semidaus pulitamein ils davos onns. Oz presenta la garascha il model reschniev dil RAV. El ei daventaus in auto per glieud dils marcaus. Ed el ei in hibrid, pia la tracziun ei cumbinada cun benzin e cun electricitad. Ch’il niev Toyota RAV ei per glieud dils marcaus lai Aldo Beeli buca valer. Ei seigi in auto per glieud ch’ha bugen il RAV, ch’appreziescha ina limusina spargnusa e ferma, equipada cun tutta tecnologia pusseivla. Igl ei buc in auto luxurius, el ei pratics, ruasseivels ed era l’estetica perschuada.

Il niev Toyota RAV4 san ins admirar oz duront las uras da biro tier la garascha Aldo Beeli SA a Glion.