In rösa a la 20avla 
cuorsa da duonnas

DAD ANNATINA FILLI / ANR

Passa 1000 duonnas s’han annunzchadas per la cuorsa da duonnas dal Maraton da skis engiadinais. Tanter ellas eir 56 duonnas chi’s partecipeschan a favur da la perscrutaziun e prevenziun dal cancar da bruost. Eir ingon vain demuossada la solidarità cun persunas pertoccas da cancar da bruost e quai a chaschun da la 20avla cuorsa da duonnas chi ha lö ün’eivna avant il Maraton da skis engiadinais. Actualmaing s’han annunzchadas tanter oter 56 passlunghistas per la cuorsa dals 3 da marz, ellas as partecipeschan a l’acziun «Mascha Rösa». Cun lur partecipaziun voulan ellas render attent al cancar da bruost e ramassan al medem mumaint donaziuns chi van a favur da Lia da cancar dal chantun Turich e da quella grischuna.

Ün’istorgia da success

Da l’on 2000 es gnüda realisada la prüma cuorsa da duonnas chi maina da Samedan fin a S-chanf. La cuorsa da 17 kilometers ha adüna lö la prüma dumengia dal mais marz. Fingià pro la prüma ediziun vaivan as partecipadas 728 passlunghistas ed ün on plü tard d’eiran fingià 792 atletas da la partida. Il böt da pudair registrar illa glista da rangaziun passa 1000 curriduras s’haja ragiunt da l’on 2014. I’ls ultims 20 ons haja adüna darcheu dat adattamaints pro la cuorsa da duonnas. Daspö l’on 2015 segua la partenza in tschinch blocs e quai sco pro’l Maraton da skis engiadinais davent da boxas da partenza. Plünavant s’haja spostà la partenza da la plazza aviatica in l’Arena da sport Promulins a Samedan. Ün on plü tard s’haja optimà ün’ulteriura jada la procedura da la partenza. «Actualmaing vain nus 1051 annunzchas, quai chi significha ün augmaint da 20 pertschient congualà cun l’on avant», disch Catherine Fischer, la respunsabla pels mezs da massa pro’l Maraton da skis engiadinais. Las lavuors da preparaziun per la 20avla cuorsa da duonnas sun, tenor ella, sün buna via.

Bundant 60 atletas in rösa

Daspö ot ons as poja observar a la cuorsa da duonnas curriduras illa culur rösa. Ellas tuottas as partecipeschan a l’acziun «Mascha rösa» e rendan cun quai attent al cancar da bruost. Inizianta da la «Mascha rösa» es statta a seis temp Sigrid Engi da Puntraschigna. Da prüma davent ha’la survgni sustegn da la Lia da cancar dal chantun Turich e plü tard eir da quella dal Grischun. «Las passlunghistas in rösa toccan intant pro quista cuorsa ed impustüt per l’ediziun da giubileum nu das-chan ellas mancar», manzunan ils respunsabels da las duos lias da cancar. Els s’allegran dal grond interess per quist’acziun: «Actualmaing vaina pudü registrar las annunzchas da 56 curriduras chi cuorran lura in 14 gruppas, dimena ün nouv record.» La culur rösa nu sarà preschainta be sül traget, dimpersè eir lung quel, a la partenza sco eir al böt.

Madame Maraton da skis engiadinais

Per la 20avla ediziun da la cuorsa da duonnas ha il comitè d’organisaziun planisà a Promulins a Samedan per la sonda avant la cuorsa ün program da giubileum. Quel cumainza davomezdi a las 15.30 cun ün «Pre-Race Yoga & Meditation» cun Ursulina Badilatti. I segua il pled festiv da Menduri Kasper, il mainagestiun dal Maraton da skis engiadinas, ed ün referat davart il cancar da bruost da Ladina Christoffel, la schefdoctoressa da la gineologia e da l’assistenza al part a l’opidal d’Engiadin’Ota. Plünavant preschainta Françoise Stahel seis cudesch «Der lange Lauf von Madame Engadin Skimarathon». Stahel as partecipescha quist on per la 51avla jada al Maraton da skis engiadinais e per la seguonda vouta insembel cullas curriduras da la «Mascha rösa» a la cuorsa da duonnas.