1000 hosps alla tiarza BaKi
(anr/sr) La tiarza exposiziun da rauba e purschidas per famiglias BaKi ei stada in success cumplein cun rodund 1000 hosps. 70 exposituras ed expositurs dalla regiun e dall’entira Svizra han mussau la sonda vargada lur purschidas per l’entira famiglia. El focus ein denton adina ils affons stai, dils nievnaschi entochen ella vegliadetgna da dudisch onns. La purschida adattada per els ei enorma ed ins ha mo saviu smarvigliar tgei ch’ei dat tut e quei bunamein avon casa. Naven dalla schnadrina che muossa era da cuser tochen tier la fotografa ni l’artista che fa decoraziuns e termagls da lenn ha ei propi dau empau diltut da veser, empruar e secapescha era cumprar. La BaKi ei denton buc en emprema lingia in liug da far gronds gudogns culla vendita, mobein plitost per empustir contacts e mussar presenza. Sonja Lombriser, l’organisatura dalla BaKi, ei en mintga cass satisfatga: «Nus essan fetg cuntents, ton dils hosps sco dils expositurs hai jeu survegniu mo buns resuns», selegra la mumma da quater affons.
pagina 3
Gust da leger dapli?