BaKi – in liug da sentupada 
per famiglias

DA SUSI ROTHMUND / ANR

Onn per onn attira la BaKi – l’exposiziun per pops ed affons e lur famiglias – pli e pli bia visitaders. La sonda han ver 1000 persunas visitau l’exposiziun ellas hallas dalla scola dil marcau a Glion per mirar, cumprar e s’informar davart la purschida dils 70 expositurs. Aschia ei era la tiarza BaKi stada in liug da sentupada per famiglias. Pops, affons, geniturs, tats e tattas, augs ed ondas e massa interessai han visitau l’exposiziun e gudiu il program accumpignont. L’organisatura ed inizianta, Sonja Lombriser, ei satisfatga e discuora d’in success cumplein. Sco gia las empremas duas ga ha ella era organisau questa BaKi sulet cun in pign team da gidontras e gidonters. Massa reacziuns positivas hagi ella survegniu e quei ton d’expositurs sco da visitaders.

Negina liunguriala

Ils affons han gudiu il program variont ch’ha tunschiu naven dad ir cun poni, circus, saltar entochen zambergiar ni schar smincar ed empruar ora la purschida dalla Ludoteca dil marcau – propi negin ha stuiu haver lungurus. Geniturs han forsa scuvretg caussas e purschidas aunc nunenconuschentas ed han en mintga cass saviu turnar a casa cun massa ideas. Sin plirs stans han ei saviu schar cussegliar da persunas dil fatg, per exempel davart in tema fetg polarisont sco il virolar ni era davart il nutriment e perfin tractaments cumbinai cun hipnosa ed auter. Igl ei era stau ina caschun ideala per empustir novs contacts e forsa perfin per scuvierer in niev hobi creativ. Mo era per quels ch’han buc, ni buca pli affons pigns, ha ei dau in tschuat da mirar e cumprar ed era per quels alla tscherca da regals per famiglias ei la BaKi in liug adattau. Sco Lombriser di ein fetg biars dalla regiun e dall’entira Svizra interessai da mussar lur purschida alla BaKi. Probablamein buc il davos era perquei che l’organisatura metta a disposiziun il plaz fetg favoreivel. «Ad enzacons expositurs ch’ein s’anunziai il davos hai jeu deplorablamein stuiu dir giu, autruisa havess jeu aunc stuiu affittar ina tiarza halla.» Allas empremas duas exposiziuns dueva la purschida oravontut plidentar famiglias cun affons tochen sis onns. Uonn ha Lombriser denton era mess il focus sin famiglias cun affons da sis tochen dudisch onns. Ina gruppa che duei el futur aunc vegnir plidentada pli fetg alla BaKi.

Per famiglias

Tenor Lombriser enconuschevien per dabia buca tut ils visitaders tut las purschidas. L’interessanta e vasta purschida hagi fatg surstar enqualin. Aschia ha l’organisatura era contonschiu ina da sias pli impurtontas finamiras, numnadamein d’animar da cumprar ton sco pusseivel ella regiun ni silmeins en Svizra. Secapescha nezegia era l’organisatura sezza la BaKi per mussar sia purschida che tonscha da cuors da saltar per affons tochen tier cuors da gimnastica per mummas e pops. Era en muments grevs dalla veta ni tier damondas difficilas dat ei posts ed organisaziuns che gidan. Per tut quei che pertucca il temps da scola dat ei ussa la nova purschida «sQuola» dalla pedagoga Rahel Haymoz e dil manager da formaziun Silvio Dietrich (La Quotidiana vegn a presentar quella purschida en ina dallas proximas ediziuns). Lu ei era l’organisaziun «Herzensbilder.ch» sepresentada, igl ei quella organisaziun che possibilitescha bellezia fotografias da famiglias en grevas situaziuns dalla veta. In liug da sentupada ei era uonn l’ustria endrizzada en in cantun d’ina sala stada e leu han ils hosps perfin saviu guder ina buna tratga tailandesa.

www.baki-messe.ch