Banca Chantunala Grischuna – d’in record a l’auter

(anr/gc) Igl è mintgamai in plaschair d’astgar assister a la conferenza da bilantscha annuala da la Banca Chantunala Grischuna (BCG). Dapi onns intervegnan ins da resultats recordials e d’ina ferma consolidaziun. Tant il chantun sco ils participants profiteschan considerablamain da quel success cun in’auta dividenda. Chapaivel ch’il president da la BCG, Peter Fanconi, sa legra dal success da «sia» banca. La BCG sa fatschenta cuntinuadamain cun si’orientaziun strategica. La principala pertutga la diversificaziun, realisada cun augmentar la fatschenta d’investiziun ed administraziun da la facultad. L’effect positiv sa mussa en il resultat cuntanschì.

Tenor il CEO (directur) Alois Vinzens è la BCG creschida a moda legraivla sin tut ils champs commerzials. Uschia po ella confermar sia posiziun a la testa dal martgà en il Grischun. Era ha la BCG pudì investir fermamain cun success en ses projects innovativs.

Il grond gudogn 
da 198 milliuns

Il gudogn dal concern è nudà cun 185,1 milliuns (+2,7% visavi l’onn precedent). Il resultat da fatschenta sa preschenta cun 196,1 milliuns (+0,4%). Il gudogn net – avant las reservas – è cudeschà cun 198 milliuns, pia datiers da 200 milliuns.

Considerabla è era stada l’afflusiun da novs daners cun 924,6 milliuns e la creschientscha tar las ipotecas sin 687,3 milliuns (+4,2%). Il volumen da fatschenta è creschì sin 52,9 milliardas e la facultad da la clientella s’augmentada per 3,5 milliardas sin 33,2 milliardas. La BCG dispona d’ina quota surproporziunala d’agen chapital. Fertant ch’il dretg prescriva 12,8% sa munta ella tar la BCG a 18,8% sco reservas d’agens meds (2,5 milliardas).

Fitg positivs èn era stads ils resultats dals instituts bancars colliads cun la BCG ordaifer il chantun, uschia la banca privata Bellerive a Turitg cun in gudogn da record e per l’emprima giada ina consolidaziun cumplaina da l’administraziun da la facultad d’Albin Kistler a Turitg. Quai demussa era che la BCG ha surmuntà ils cunfins dal martgà intern e contribuì a la diversificaziun.

Chantun e participants 
profiteschan

Il resultat excellent pussibilitescha a la BCG da mantegnair ina dividenda da 40 francs. En tut vegn pajà al chantun ed als participants ina dividenda da record da 100 milliuns francs.

Quai dess 440 francs per scadin abitant da noss chantun. Il chantun survegn 87,4 milliuns (inclus per la garanzia statala). 3,2 milliuns èn vegnids sponsurads per projects da cultura, sport, economia e societad.

In sguard en l’avegnir

Ins quinta che la fatschenta da tschains sa reduceschia vinavant pervi dals tschains negativs constants. Il svilup dal resultat da fatschenta na pretenda betg in’ulteriura reducziun da las posiziuns tar las ristgas. Ins possia quintar per quest onn cun in resultat da 175–180 milliuns.

La BCG è er ina gronda patruna ch’occupescha pli che 1000 collavuraturas e collavuraturs.

Ella dispona d’ina rait da 52 agenturas en l’entir chantun, quai che saja anc adina bler. En la media vegnian trais filialas serradas ad onn, là nua ch’il basegn na saja betg pli dà e na ord raschuns finanzialas.

Il servetsch al spurtegl sa reducescha per 10% ad onn. Pli e pli è dentant la cussegliaziun dumandada.