Dallas benedictinas da Claro el Tessin

(cp) La claustra da benedictinas a Claro daventa puspei autonoma. 1971 era la claustra, situada el vitg sur Blizuna, che s’auda ussa tier la capitala tessinesa, s’unida cun la claustra benedictina da Rosano ella vischinonza da Florenza (Italia). La raschun per l’uniun era stada a sias uras la munconza da soras. Ed aschia mavan las mungias d’ina claustra a l’autra. Quei seigi denton – ord vesta benedictina – buca stau optimal e la stabilitad, impurtonta per quei uorden, strusch stada da realisar. Malgrad la separaziun vegnien ins denton a tgirar vinavon bunas relaziuns cun la claustra giu l’Italia.

Cun la lubientscha dil papa ei la claustra da Claro puspei daventada autonoma. Quei ha l’abbadessa dessignada, la priura Maria Sofia Cichetti, communicau a caschun dil di dalla «veta consecrada» el rom d’in survetsch divin ch’ha giu liug sonda ella catedrala da Ligiaun. Quel ei vegnius celebraus da pader Mauro Jöhri, da Beiva, anteriur minister general dils caputschins. Ils 9 da fevrer vegn msgr. Valerio Lazzari, uestg da Ligiaun, a benedir la priura da tochen ussa sco abbadessa. Ella claustra a Claro vivan dapresent endisch benedictinas. Da quellas ein quater Tessinesas. La claustra da Claro, erigida 1490, ei la pli veglia el Tessin.

Agid e viseta neu da Mustér

La claustra da Claro vegn sustenida dapi 20 onns d’in’uniun dad amitgs ton materialmein sco spiritualmein. Agid ei era vegnius neu dalla claustra da Mustér. Igl onn vargau han ins priu si l’unfrenda dalla fiasta da s. Placi per la claustra da Claro. Igl atun 2018 ha la tradiziunala excursiun dil convent da Mustér giu liug a Claro tier las benedictinas nua ch’igl ei vegniu celebrau in survetsch divin da cuminonza tras avat Vigeli Monn. La hospitalitad seigi stada fetg gronda e persuenter ei era vegniu engraziau, sco quei ch’ins ha saviu leger ella revista «Disentis» 2/2018.