In cler na – in cler gea

DA GION NUTEGN STGIER / ANR

In cler na dal suveran da Vaz per la realisaziun da la nova plazza da sport cun in bajetg multifuncziunal. Da las 12 vischnancas da la Regiun Malögia èn 11 da l’avis che la regiun duaja realisar ina halla da glatsch e na ina singula vischnanca. Dasper la votaziun federala han er intginas vischnancas gì da decider per ubain cunter in project. Las 12 vischnancas tranter la Bregaglia e S-chanf han gì da vuschar sche la Regiun Malögia duaja surpigliar l’iniziativa per realisar ina halla da glatsch regiunala e surlavurar quel project. Dapi decennis è ina halla da glatsch per l’Engiadin’Ota in tema, dentant senza ch’ina da las 12 vischnancas avess gì interess da realisar quella.

Nagina surpraisa

Il project per realisar ina nova plazza da sport cun dus bajetgs amez Lai era fitg dispitaivel. Ina gronda part da la populaziun era da l’avis che la suprastanza ed il cussegl communal da Vaz sajan stads memia pauc transparents. Da budgetar per quel project 2,5 milliuns francs e suenter preschentar in project cun custs da bunamain sis milliuns saja tut auter che giustifitgà. Ultra da quai eran bleras persunas er cunter il bajetg multifuncziunal sco preschentà da la vischnanca. Il suveran ha refusà il credit da 5,9 milliuns francs per la realisaziun da la nova plazza da sport e dus bajetgs cun 631 vuschs tar 258 vuschs tar ina participaziun da 52,5%

Be in na da la vischnanca Bregaglia

Cun 77,55% han las 12 vischnancas da la Regiun Malögia acceptà che la regiun duaja prender l’iniziativa per realisar ina halla da glatsch per l’Engiadin’Ota. La participaziun è dentant stada cun 38% plitost bassa. Be la vischnanca Bregaglia ha ditg na al project. Per ils represchentants da la societad Pro Eishalle Engadin è il cler gea da las 11 vischnancas in vair success. Il quorum, quel era fixà tar set vischnancas ch’avevan da dir gea al project.

Vischnanca GEA NA

Bever 132 26

Bregaglia 166 174

La Punt-

Chamues-ch 136 36

Madulain 49 19

Puntraschigna 371 69

Samedan 532 193

S-chanf 108 37

Schlarigna 322 41

Segl 144 27

Silvaplauna 159 31

San Murezzan 874 204

Zuoz 216 73

Total 3209 929