«Tusen takk – grazia fitg»

DA GION NUTEGN STGIER / ANR

Cun terminar Aksel Lund Svindal sia carriera sco skiunz banduna in dals «gronds» la tribuna internaziunala da skis. Il Norvegiais ha gudagnà 36 cursas da la Cuppa mundiala e duas giadas er il classament general. Scrit istorgia sco skiunzs da success avevan gia ils dus Norvegiais Kjetil André Aamodt e Lasse Kjus. Il medem vala dapi sonda passada er per Aksel Lund Svindal cun il Norvegiais prender cumià da la Cuppa mundiala da skis e da la tribuna internaziunala dal ski alpin. La cursa rapida dals Campiunadis mundials da skis ad Åre è stada sia davosa en sia carriera activa da 18 onns. Suenter ses segund plaz en quella cursa irregulara è lura Svindal er vegnì festivà uschia sco sch’el avess gudagnà la cursa. Il Norvegiais è stà in skiunz popular, in atlet cun format, in sportist cun in profil ed ina persuna cun in grond carisma. Quai vegn l’um da 36 onns er anc a restar per blers onns e sia popularitad da gronda immensitad.

Medaglias en seria

Dapi il 2001, quel onn che Svindal è per l’emprima giada partì tar ina cursa da la Cuppa mundiala da skis, ha el gudagnà 36 cursas. Tar Gieus olimpics ha il Norvegiais fatg quatter medaglias (duas dad aur, ina d’argient ed ina da bronz). Il 2018 a Pyeongchang è el anc daventà campiun olimpic en la cursa rapida. Da Campiunadis mundials da skis è Svindal turnà a chasa cun nov medaglias e da quellas gist tschintg dad aur. Ultra da quai ha el er anc gì fatg sco junior trais medaglias tar ils Campiunadis mundials. La rangaziun finala da la Cuppa mundiala ha il sportist gudagnà duas giadas, il 2006/2007 ed il 2008/09. Svindal merita er noss respect e perquai: «Tusen takk – grazia fitg.»