Dapli temp per Lucy

DA GION NUTEGN STGIER / ANR

In di suenter ch’Aksel Lund Svindal ha ditg adia al sport da prestaziun ha cun Lindsey Vonn in auter grond star da skis prendì per adina cumià da la Cuppa mundiala da skis. Ussa vegn ella a sa deditgar al film e lura cunzunt er a ses chaun Lucy. Dapi ils Campiunadis mundials da skis a San Murezzan avant dus onns ha la skiunza americana di e notg in partenari fidaivel. Na, quai è betg forsa il golfist Tiger Woods, mabain il chaun Lucy. En il fratemp è quel gia in star e quasi uschè popular sco sia patruna. Er ad Åre è Lucy adina en la vischinanza da Lindsey Vonn ed attira er la simpatia dals blers fans che l’Americana ha sco strusch in’autra skiunza. Vonn e Lucy èn in pèr glamurus e che procura per baterlim e tschantscherlim er tar nus. La skiunza dals Stadis Unids da l’America è simpatica, bella e stat er gugent en il center da mintga societad illustra e quai er da preschent ad Åre. Segir tutga ella tar in dals gronds stars da sport e cumparegliar ins dastga Vonn bain er cun ils sportists da la classa auta scu Roger Federer, Usian Bolt ubain er Michael Schumacher.

82 giadas sisum il podest

En sia gronda carriera da prest 20 onns ha Vonn gudagnà 82 cursas da la Cuppa mundiala da skis. Il pli sisum il podest è l’Americana stada tar 43 cursas rapidas, 28 Super-G, tschintg cumbinaziuns alpinas, quatter slaloms gigants e dus slaloms. Ultra da quai è la skiunza da 34 onns er anc stada 137 giadas sin il podest. Tar Gieus olimpics ha Vonn fatg trais medaglias e tar Campiunadis mundials da skis otg medaglias. Terminà sia carriera ha la gronda figura da skis cun gudagnar la medaglia da bronz tar la cursa rapida ad Åre e deditgar quella a tut ses fans fidaivels e natiralmain er a ses pli grond ami, Lucy!