Gio sa mossan igls amprems gronds success

DA GION NUTEGN STGIER / ANR

Onour pigl campiun mundial da biatlon digls giuvenils Niklas Hartweg. El ed Amy Baserga, ella tgi ò fatg òr ed argient tar igls Campiunadis mundials da biatlon digls juniors, èn nias retschets a Lantsch da blers gratulants. Egn da chels era cunsiglier guvernativ Jon Domenic Parolini. Ad Osrblie (Slovachia) on gi li igls Campiunadis mundials da biatlon digls juniors e digls giuvenils. Tar chella occurrenza internaziunala cun 350 participants e participantas da prest 40 naziuns on Niklas Hartweg tgi stat a Lai ed Amy Baserga, la biatleta da Nossadunnang, an veir senn scretg istorgia. Hartweg è nia campiun mundial tar igls giuvenils ainten la cursa singula e turno a Lai cun la medaglia dad ôr. Termino igls Campiunadis mundials gist cun far dus medaglias ò Baserga. Gudagnea ò la matta dalla Svizra centrala la medaglia dad ôr ainten la cursa singula ed en de siva fatg la medaglia d’argient ainten la cursa da sprint.

Da gronda valour

Lour medaglias èn da gronda valour pigl sport da biatlon ed anc da pi gronda valeta per l’Arena da biatlon da Lantsch. Cò on igl biatlet e la biatleta fatg la basa pigl grond success ad Osrblie, è l’Arena gio igl li principal da trenamaint pigl cader da biatlon dalla Svizra orientala, agl qual Hartweg ed er Baserga appartignan. Pigl biatlon svizzer e per chel sport è l’Arena da biatlon da Lantsch da fitg gronda muntada. Las relaziuns da trenamiant èn optimalas e chegl betg angal igl anviern, mabagn er la stad. Igls success digls biatlets svizzers e dallas biatletas svizras e chegl sen ples scalems èn an mintga cass en grond maret dall’unica arena da biatlon tgi dat an Svizra. Bel è bagn tgi cun las medaglias da Hartweg e Baserga igl è ossa sa musso igl amprem grond success graztga alla pussebladad da trenar pi savens a Lantsch ainten l’Arena. Da sperar è tgi planget veian er igls pi gronds critichers dall’Arena da biatlon da Lantsch tge valour tgi chella ò ed er tgi las investiziuns on valia la pagna. An chella tgossa è d’aveir adegna puspe tot respect digls iniziants cun Ursin Fravi scu «motor», digl cumegn Lantsch e digls oters cumegns tgi èn sa mussos generous cun chel project. Igl madem vala er per Michael e Carola Hartweg, igl pêr tgi ò alla fegn finala tuttegna investo diesch milliuns francs per realisar la Tgesa Nordica ed igl bietg multifuncziunal dall’Arena.

Daveiras ena gronda 
prestaziun

Agl bavagnaint da Niklas Hartweg e dad Amy Baserga èn nias blers ameis ed ameias digl sport da biatlon e chegl dagliunsch e damanevel. Ena rotscha gratulants e gratulantas on fatg onour agl sportist ed alla sportista cun esser dalla parteida. Egn da chels gratulants è sto cunsiglier guvernativ Jon Domenic Parolini. El ò detg tgi igl success da Niklas Hartweg ed Amy Baserga seia daveiras ena gronda prestaziun. Igl schef digl departamaint d’educzaiun, cultura e sport ò detg tgi gist an vista agls Campiunadis mundials da biatlon digls juniors e giuvenils 2020 a Lantsch seia chel success ad Osrblie gist la dretga motivaziun.

Nino Schurter 
en bung exaimpel

Tgi seia pussebel d’aveir success an sia atgna patria vegia bagn er musso Nino Schurter cun daventar igl settember 2018 a Lai campiun mundial, ò detg Parolini. El spera tgi l’euforia digls Campiunadis mundials da bike 2018 a Lai sa mossa er tar igls Campiunadis mundials da biatlon digl juniors e giuvenils igl schaner 2020 a Lantsch. An mintga cass seia el da buna speranza tgi igl team svizzer da biatlon digls juniors e giuvenils vigna a mussar bunas cursas an en onn all’Arena da biatlon da Lantsch. Respect maretan pero betg angal Niklas Hartweg ed Amy Baserga, mabagn er lour genitours tgi seian la pi ferma pitga ed igl pi grond sustign durant l’antiera carriera da sport.