In’untgida sligiass plirs problems

Da Hans Huonder / anr

Cun ina via ni schizun in tunnel d’untgida per Mustér savess il vitg vegnir descargaus dil traffic ed il medem mument savess il problem dil prighel da lavinas pil traffic ella Val S. Placi vegnir sligiaus. Deputau Clemens Berther sedrezza ussa cun novas ideas alla regenza grischuna. Da dis cun bia neiv nova sto la via cantunala denter Sumvitg e Mustér adina puspei vegnir serrada. Quei capeta buca mintg’unviern, mo caschuna secapescha malaveglia, era tier hosps da vacanzas. Clemens Berther propona uss alla regenza entginas pusseivladads per soluziuns. Ina ei d’endrizzar ella Val S. Placi in semegliont indrez d’alarm sco quei ch’el exista ella Val Lumpegna. Ella Val Lumpegna la finfinala duei vegnir montau in indrez da sittar lavinas. Tier neiv nova duei quei indrez cun telecommando vegnir mess en funcziun regularmein per aschia descargar successivamein las plauncas dalla neiv. La finfinala tematisescha Berther, ch’ei era vicepresident communal da Mustér, medemamein la damonda d’ina via d’untgida per Mustér. Sco quei ch’el ha detg sin damonda dall’Agentura da novitads rumantscha ein duas variantas il mument en discussiun enteifer la suprastonza communala, en emprema lingia per descargar il vitg dil traffic. Ina ei la viarianta aschidadir veglia cun via d’untgida el sid dil vitg, l’autra in’idea nova cun in tunnel el nord dil vitg. «La finamira ei segiramein da realisar ina varianta che sligia la problematica davart il prighel da lavinas dalla Val S. Placi», puntuescha Berther.

Pagina 3