Nov stadion da ballape a Cuira s’entarda

La halla da chavaltgar SA e la citad da Cuira n’han betg chattà in cumpromiss. Curt suenter la votaziun e l’acceptaziun dal project «Eisball» eran atgnamain omaduas partidas da buna speranza ch’ellas chattian ina soluziun. La halla da chavaltgar resta fin il 2023 sin l’areal Obere Au. Il stadion da bal po pir vegnir construì cura che la halla è stgarpada giu ed è uschia betg terminà avant il 2025. I na dat uschia nagin sustegn finanzial da la citad per ina nova halla da chavaltgar.

Curt suenter la votaziun e l’acceptaziun dal project «Eisball» eran atgnamain omaduas partidas da buna speranza ch’ellas chattian ina soluziun. Uss na vulan ils acziunaris da la halla da chavaltgar a Cuira dentant tuttina betg bandunar avant che necessari l’areal Obere Au e restar là fin ch’il contract da dretg da construcziun scada la fin dal 2023. Quai munta ch’els na survegnan betg ina summa d’indemnisaziun da la citad per construir ina nova halla.

En cas ideal avess il project «Eisball» gì dad esser a fin il 2021. Cun quai che la halla da chavaltgar ha in contract da restar fin il 2023 sa stauscha il termin per la nova halla. Quella po ussa vegnir realisada il pli baud fin l’entschatta 2025. Pia circa trais onns e mez pli tard che planisà. La societad da la halla da chavaltgar na saja betg stada cuntenta cun la plazza tar la Untere Au che la citad avess mess a disposiziun. Er ils 300 000 francs che la citad ha fatg amogna n’haja la societad betg vulì. Quests daners avess la citad pudì spargnar cun betg stuair construir il project en etappas.

Il project vegn uss realisà en pliras etappas. La halla da sport nova n’è betg pertutgada da la halla da chavaltgar. En in emprim pass vegnan realisadas la halla da sport e pliras plazzas cun pastget natiral. L’emprima etappa duai esser a fin l’avust 2021. La segunda etappa po pir vegnir realisada cura ch’il contract cun la halla da chavaltgar curra giu 2023.