Bandischar whatsapp dalla scola

Dad Andreas Cadonau / ANR

La communicaziun denter scolars, geniturs e persunas d’instrucziun ei gia adina stada impurtonta e succeda ozilgi en biaras scolas via il survetsch da communicaziun whatsapp. Per motivs dalla protecziun da datas scusseglia l’uniun tetgala dallas persunas d’instrucziun svizras il diever dall’applicaziun en possess dil concern facebook. Na, dil tuttafatg ei la renomada cadeina da telefons buc in relict da temps passai dalla scola populara. In mied applicaus duront decennis per segirar l’informaziun davart dalla scola via scolars e geniturs. Gest la scola da Mustér ch’ha stuiu serrar nunplanisadamein la scola pervia dallas nevaglias l’entschatta schaner ha fatg diever da quella cadeina per contonscher scolars e geniturs, sco quei ch’il meinascola Roger Tuor ha explicau, principalmein sil scalem primar. El ha denton era concediu ch’il survetsch da novitads cuortas whatsapp vegni per part duvraus ella scola da Mustér. Il survetsch gratuit che possibilitescha da s’organisar en singulas gruppas da communicaziun ei sederasaus en paucs onns sur igl entir globus. Tuor ha explicau che scolaras e scolars dalla scola superiura da Mustér vegnien equipai a partir da l’auter onn cun laptops, aschia che la communicaziun denter scola, scolars e geniturs sappi succeder via e-mail. Al meinascola ein las resalvas stipuladas dall’uniun tetgala dallas persunas d’instrucziun svizras viers whatsapp beinenconuschentas. Il president dall’uniun da scolastas e scolasts Beat Zemp ha explicau viers radio SRF da bein renconuscher l’attractivitad dallas applicaziuns che possibiliteschan da communicar en gruppas. El ha denton argumentau las resalvas da sia uniun viers whatsapp e la recumandaziun allas scolas da desister da quella plattafuorma da communicaziun pervia dalla protecziun munglusa dallas datas dils singuls applicaders.

Furniturs dalla fiera da datas

Zemp ha getg che whatsapp appartegni al concern facebook e furneschi datas dils applicaders a quei concern. Damai ch’il scamond da far reclama via whatsapp crodi proximamein seigi ei da quintar che facebook plazzeschi reclama individuala via whatsapp, gest per la scola buc acceptabel. Igl interprendider Marc Cathomen, bein cudischaus el mund electronic, ha confirmau che whatsapp furneschi datas da ses applicaders a facebook. Il concern s’interesseschi denton buca per las novitads sco talas. Las novitads scuntradas denter las singulas gruppas da whatsapp ein codadas e novitads romontschas probabel dublamein. Interessant per facebook ei denton il secuntener dil singul ella reit, tgi communichescha cun tgi e da tgei liug anora. Sper las datas dils utilisaders dall’atgna plattafuorma surveschan whatsapp ed instagram ulteriur material a facebook. La massa da quellas datas lubescha al concern da definir il secuntener dad ina pintga gruppa da carstgauns. Cathomen ha purschiu in exempel che facebook possi probabel definir ina gruppa grischuna forsa schizun lumneziana che cumpri ina marca specifica da jeans. Quella gruppa retscheivi aschia la reclama corrispundenta, buca da facbook direct. Il concern venda sias informaziuns ad autras firmas, ina fatschenta da milliardas. E quei che procura per in tec pial gaglina ein buca sulet las informaziuns davart il secuntener economic recaltgadas, mobein talas davart il cumportament e sensori politic.

Scamond ed alternativas

Reagau ha gia la scola da Glion e bandischau whatsapp dalla scola, sco quei ch’il menader Silvio Dietrich ha confirmau. Gest sil scalem superiur dalla scola da Glion era whatsapp en diever per communicar denter scola, scolars e geniturs. Dietrich ha explicau la tscherca dad alternativas essend ch’era la plattafuorma educanet.ch siara sias portas la fin 2020. La plattafuorma specifica per il diever dalla scola realisada antruras ella reit ha piars si’attractivitad. A Cathomen ein ton las alternativas sco scamonds suspects. El attribuescha alla Svizra en general ina munglusa enconuschientscha dil mund digital ed ha fatg attent allas pusseivladads existentas dad impedir la deflessiun da datas dil secuntener persunal ella reit. El vesa la scola incaricada da porscher las informaziuns necessarias e sensibilisar scolaras e scolars viers in cumportament critic el mund digital. Ordvart il cerchel dalla scola resta whatsapp attractivs per scolaras e scolars ed ei vegn vinavon fatg stedi diever dil survetsch gratuit.