Chor Maschadà Grischun Turitg

A caschun dalla radunonza generala dils 6 da favrer 2019 ha il Chor Maschadà Grischun Turitg saviu mirar anavos sin in bi e bien onn da cant. Ils puncts culminonts ein segiramein ils concerts communabels cun il Chor Viril Rumantsch Zug e quel cun il Chor maschadà Tschlin stai. Ils 26 ed ils 27 da matg ei il chor da Turitg sepresentaus ensemen cun ils cantadurs da Zug. La sonda en la baselgia da sogn Marin a Baar e la dumengia en la baselgia reformada da Richterswil. Si leu haveva il chor da Turitg stuiu untgir cunquei ch’igl arviul dalla baselgia da sogn Giusep a Turitg, nua che l’occurrenza dueva haver liug, era daus ensemen. Tuttina eis ei reussiu alla suprastonza dad organisar il davos mument il niev liug e far paleis quella midada dapertut entuorn. En mintga cass ha mintgamai in grond auditori saviu guder bi cant da chors sin in bien scalem musical. Igl applaus ha lu era fatg bein a cantaduras e cantadurs e confirmau danovamein che preparaziuns solidas sepagan.

Turitg e Tschlin

Ina premiera sin ina moda ei il concert communabel cun il Chor masdà Tschlin stada. L’emprema gada cun in chor ord l’Engiadina. L’dea per quella sentupada cantica ei vegnida dalla presidenta dil chor da Turitg, Anna Giovanoli Liver, oriunda dall’Engiadina. Ella ha tratg ils fils da contact.

Per l’emprova cumineivla ein ils dus chors s’entupai la dumengia, ils 18 da november el center dalla Scola media evangelica ad Aschera. Igl ei stau ina biala sentupada cun ils dalla Val digl En ed ina emprova concentrada e efficienta. El center dalla lavur cumineivla ein las tschun canzuns dil cumponist engles John Rutter stadas. Instrumentalmein ein quellas vegnidas accumpignadas da musicistas e musicists da Tschlin, da Madlaina Janett, viola, Cristina Janett, violoncello e da Curdin Janett, accordeon.

Il concert a Turitg en la baselgia dils predicaturs la dumengia dils 2 da december ha attratg roschas da Romontschas e Romontschs da tuts idioms. Tochen sil davos plaz ei la baselgia stada emplenida. Audituras ed auditurs han saviu guder in concert dad atgna tempra. E strusch enzacu ei in’aschi gronda raspada da Romontschas e Romontschs ord tuts idioms seradunada ad in’occurrenza romontscha a Turitg, che seigi la pli gronda vischnaunca romontscha. Sco ei vegn detg.

L’acustica surprendenta en la baselgia da sonch Flurin a Ramosch ha gia fatg ord l’emprova communabla dil suentermiezdi dalla sonda dils 8 da december enzatgei sco in eveniment special. Schegie frestg ni plitost scardaliu. Denton pli ch’il temps dil concert s’avischinava la sera e pli che la baselgia s’empleneva e pli emperneivel ch’ei era da cantar. In grond auditori ord las vischnauncas dil contuorn ha empleniu e scaldau la baselgia. In auditori attent ed engrazieivel. Suenter concert ein cantaduras e cantadurs da cheugiu e leusi aunc serimnai el restaurant dil hotel per in bien sitg e bia cant. Forsa ha quei cuzzau aschi ditg perquei che sonch Flurin duessi haver giu midau aua en vin.

Nova suprastonza

Sper l’egliada anavos sin igl onn cantic ei lu stau el center dalla radunonza tut in auter tema. Il chor sto encurir ina nova presidenta ni in niev president. Suenter plirs onns en suprastonza e quater onns presidenta ei Anna Giovanoli Liver sedecidida dad abdicar sco presidenta e commembra dalla suprastonza. Ella hagi fatg fetg bugen quella lavur en la quala ella hagi giu grond sustegn dall’entira suprastonza. Denton muort midadas da pensums ella veta privata e novs projects persunals hagi ella stuiu prender quella decisiun. Cantaduras e cantadurs laian buc ir bugen lur presidenta, mo acceptan cun capientscha sia decisiun ed engrazian cun in grond applaus. Cun quei ch’era Curdin Toutsch, entochen ussa cassier, ha gia avon in temps annunziau sia demissiun, sto era el vegnir remplazaus. Las suprastontas Anette Thomas, vicepresidenta, Christine Baumgartner, actuara, Irena Tuor e Sonja Friedrich stattan vinavon a disposiziun. Gabriella Riedi e Flurina Giezendanner fan dad uss naven part dil gremi. Cun quei che negin ha saviu vegnir elegiu sco presidenta ni president stat Anna Giovanoli per il mument aunc en suprastonza sco presidenta ad interim. La suprastonza ei en tut priu fetg bein en gamba, aschia ch’ella sa empalar il chor en in temps transitoric senza difficultads. Ella sa era quintar cun fetg bien sustegn dil dirgent Remo Weishaupt e digl entir chor. Per uonn ein dus concerts previ. Igl emprem ha liug dumengia, ils 26 da matg allas 17.00 en la baselgia catolica a Rüschlikon. Per l’entschatta d’advent prepara il chor cun il Chor viril Laax in concert communabel a Turitg ils 30 da november ed a Laax igl emprem da december. Ils dirigents Remo Arpagaus, Laax, e Remo Weishaupt han preparau in’interessanta schelta da canzuns dalla classica alla premoderna. Cantaduras e cantadurs da Tuirtg selegran da puspei saver concertar ensemen cun in chor si en la Surselva. Ciril Berther