Tensiun pervia dalla canzun

ils 14 da favrer 2019

(anr/abc) Igl ei in festival per tuts, per famiglias, per giuven ed attempau, giuvenils, per Sursilvans, Ladins, Surmirans e Sutsilvans. La fin d’jamna dils 15 tochen ils 17 da mars s’entaupan amaturs ed adherents dalla canzun romontscha a Trun. La conferenza da medias en Chasa rumantscha a Cuera ha entschiet – significontamein – cun ina canzun. Judit Scherrer ha embelliu la sentupada cun «Allas hirundellas» da Duri Sialm. Clau Scherrer ha accumpignau ella al clavazin. La conferenza ei era ida a fin cun ina canzun. La cantadura ha interpretau la «Serenada» dil cumponist Armon Cantieni. Melodias e cumposiziuns accumpognan dapi tschentaners il pievel romontsch.

La canzun s’udeva tiel mintgagi, quei ha influenzau entochen oz la mentalitad en tuttas regiuns. Sur cuolms e vals han ins tgirau quella particularitad. «Mintga canzun ei in crap da noss’identitad», ha Clau Scherrer circumscret. Sco quei ch’el ha denton era confermau ei quella valur culturala tuttavia buca periclitada. Igl emprem festival da la chanzun rumantscha vul denton rinforzar il sensori per quei scazi.

Gia 1984 in festival

Las duas canzuns all’entschatta ed alla fin dalla presentaziun han mess igl accent sill’occurrenza dalla fin d’jamna dils 15 tochen ils 17 da mars 2019 a Trun. La Ligia Romontscha festivescha uonn siu 100avel anniversari. Al festival eis ella denton aunc buc el center. Igl ei denton stau ina buna cumbinaziun d’orientar alla sedia dalla LR a Cuera da quei che succeda en in meins a Trun. L’uniun «La Chanzun Rumantscha» envida il pievel per l’emprema gada ad in festival ch’ei dedicaus alla canzun romontscha. En siu beinvegni ha Erwin Ardüser puntuau ch’igl emprem festival seigi a Trun, ei seigi denton planisau ch’il «Festival da la chanzun rumantscha» circuleschi alternontamein era en tschellas regiuns.

Il festival ei secristallisaus ord in’idea che cuava gia daditg. Ina gruppa entuorn Clau Scherrer ha fundau igl atun 2016 l’uniun «La chanzun rumantscha». Intent central eis ei stau da scaffir in’organisaziun purtadra per ina nova scuntrada interromontscha. Il festival ei buc ina fiasta da cant cun massa chors sco quei ch’ins enconuscha. El center vegnan la canzun, la cumposiziun, la musica romontscha. Tras ils chors e tras igl emittur «naziunal» RTR ha quella tuttavia in’excellenta plattafuorma. Ei drova denton la promoziun, novs impuls. Il Festival da la chanzun rumantscha duei vitalisar canzun e cant sco scazi dall’identitad. Uonn eis ei dil reminent exact 35 onns dapi ch’ins ha organisau a Mustér igl emprem Festival da la musica rumantscha. Quell’occurrenza digl uost 1984 ei denton stada unica. «Sch’els havessen buca calau fuss noss’occurrenza buc igl emprem festival», ha Ardüser manegiau.

12 cumposiziuns el final

Alla radunonza da fundaziun igl atun 2016 ha Clau Scherrer surpriu il tgamun dall’uniun «La Chanzun Rumantscha». Il musicist e dirigent ha iniziau l’idea da realisar in festival per la canzun romontscha. Buc ils chors, mobein la canzun dueigi esser el center, ha el puntuau. Aschia ei il festival negina concurrenza per las fiastas da cant ch’han liug regularmein.

Il secretari general dalla Ligia Romontscha, Martin Gabriel, ha puntuau en siu salid als presents che quei emprem festival corrispundi optimalmein allas finamiras dall’uniun tetgala. Buc il davos surveschi quel alla qualitad ed alla persistenza dil cant romontsch. Quei scazi particular hagi senza dubi effect era ell’economia ed el turissem, ei Gabriel perschuadius.

En il center digl interess dil festival ei specialmein la concurrenza da cumposiziuns. Igl invit che l’uniun La Chanzun Rumantscha ha lantschau avon dus onns ha anflau fetg bien resun. En tut ha ina giuria saviu selecziunar da 30 cumposiziuns, da quellas ein 12 vegnidas ella selecziun stretga. Quellas 12 canzuns novas ein repartidas sin mintgamai quater per chors mischedai, quater per chors virils e quater per chors d’affons e giuvenils. La sonda presentan treis chors ad hoc 12 tetels ed igl auditori a Trun vegn integraus ella giuria. Alla fin digl 1. Festival da la chanzun rumantscha surdat il comite la bitgetta ed annunzia il 2. Festival da la chanzun rumantscha.

Il program dils 15–17 da mars 2019

In meins avon ch’igl emprem Festival dalla canzun romontscha entscheivi a Trun ha Clau Scherrer presentau tgei che schabegia la fin d’jamna dils 15 tochen ils 17 da mars 2019.

Venderdis

Ils cantauturs romontschs arvan il festival. Ins sa visitar concerts d’Astrid Alexandre, Sidonia Caviezel, tumasch è alias Thomas Cathomen, Fiona Cavegn, Pascal Gamboni e Dario Hess. Ils concerts ein el surcombras dalla casa da scola, ella caplutta s. Onna ed ella sala d’art.

Sonda

Allas 09.30 entscheiva il program cul cant en famiglia. Ei dat ina sentupada cul Chor d’affons Sumvitg ed il Chor d’affons Surselva. Las dirigentas Flavia Walder e Rilana Cadruvi Scherrer envidan al cant aviert cun canzuns d’affons. Igl ei in’occurrenza per pign e grond, giuven e vegl.

Allas 10.45 presentan Corin Curschellas ed ils Fränzlis da Tschlin il niev disc cumpact «1,2,3 dai & hop». Las sis musicistas e musicists passiunai han rimnau, arranschau e registrau canzuns d’affons en tut ils idioms romontschs.

Allas 14.00 suonda in dils puncts culminonts dil festival, numnadamein il final dalla concurrenza da cumposiziuns. Treis chors ad hoc contan mintgamai quater canzuns. Igl auditori astga dar la vusch e premiar «la canzun dil publicum».

Allas 20.00 ei il concert da gala culla Brass Band Berner Oberland ed ils chors Incantanti e Cantus Firmus. Da cuminonza presentan quellas formaziun las «Pèrlas rumantschas III». Corsin Tuor e sia BBBO cumpleteschan la trilogia dallas «pèrlas rumantschas» ch’unescha cant da chor mischedau cun musica da brass. Denter auter ein d’udir quella sera treis premaudiziuns da cumposiziuns dil cumponist Ivo Antognini cun texts dad Arnold Spescha. Il program dalla sonda sera finescha cun in ulteriur punct culminont: Suenter il concert da gala s’entaupan tuts ella sala da cultura dalla casa da scola. Leu meinan Ursin Defuns e Gion Andrea Casanova in cant aviert cun canzuns popularas da tuttas regiuns romontschas.

Dumengia, 17 da mars

Il festival cuntinuescha allas 11.00 cun ina matinada cul tetel «La canzun d’art romontscha». Sin tribuna sepresentan il bariton Lothar Burtscher, las sopranistas Sara-Bigna Janett e Judit Scherrer, al piano accumpogna Alena Sojer. D’udir ein premaudiziuns e canzuns ch’ins auda darar dad Armon Cantieni, Gion Antoni Derungs e Benedetg Dolf.

Gest suenter, allas 12.30, suonda el center communal da Trun ina discussiun al podi cun Iso Albin, Astrid Alexandre, Peter Appenzeller, Laura Decurtins e Beni Vigne. Il secretari general dalla Lia Rumantscha, Martin Gabriel, moderescha quella sentupada.

Dapli informaziuns, empustaziuns e reservaziuns mira ella pagina d’internet