Tren sviau en in tunnel sco exercezi

(anr/hh) Il mardis sera ha in grond exercezi da salvament giu liug sil Pass dall’Alpsu. Igl ei vegniu simulau in accident cun tren el tunnel dil Calmut. Rodund tschien persunas da differentas organisaziuns da salvament e segirtad ein separticipadas a quel. Igl ei stau hectic el tunnel dil Calmut il mardis sera. Cuort suenter las 17.45 ei in tren da sport dalla Viafier Matterhorn Gottard sviaus el tunnel, el tren sesanflavan 30 persunas. Da quellas ein duas vegnidas blessadas grevamein e treis lev.

Cooperaziun da dus cantuns

Per las equipas da salvament ha ei giu num serender fetg spert el liug ed entscheiver cun la lavur d’agid. Sco quei che la polizia cantunala digl Uri scriva en ina communicaziun als mieds da massa ei il sviament inscenau d’in tren in impurtont excerezi en seracass. En quei cass special cheu eis ei stau pusseivel d’exercitar igl engaschament dallas organisaziuns da dus cantuns. Leutier eis ei stau impurtont da saver rimnar experientschas cun in liug da catastrofa ch’ei mo grev contonschibels, surtut la sera ni la notg. Las forzas da salvament alarmadas dallas organisaziuns dalla cazzola blaua han stuiu serender cun in tren da salvament ton dalla vart d’Ursera sco dalla vart dil Grischun entochen sil pass. Quei munta dabia temps d’arrivar el liug digl accident, mo era da coordinar fetg bein tgei material cargar muort il plaz limitau. Gia sil viadi enviers il pass han emprems discuors da coordinaziun saviu vegnir menai. El liug ei ina direcziun d’engaschament pil salvament allura vegnida installada. Quella ha stuiu prender survesta dalla situaziun ed instradar las empremas mesiras urgentas. Sco quei che la polizia cantunala digl Uri communichescha ha il salvament saviu vegnir surmuntaus entras ina buna collaboraziun el liug e senza pli gronds incaps. Cuort suenter las 20.30 ei igl exercezi vegnius terminaus cun success.

La direcziun ei cuntenza

La direcziun digl exercezi ei cuntenza cun quei engaschament pretensius. Quel ei vegnius exequius tenor plan. «Las differentas mesiras da segirtad, agid e salvament ein sesplegadas ruasseivel e coordinau, quei malgrad la stgiraglia, neiv e temperaturas bassas», scriva la polizia cantunala digl Uri. Funcziunau senza problems ha surtut la collaboraziun dallas forzas d’engaschament cun ina direcziun cumpleina dalla polizia. Igl exercezi ch’ei vegnius organisaus digl inspectur da pumpiers dil cantun Uri, Stefan Dahinden, en collaboraziun cul cumandant dils Pumpiers Sursassiala e l’Assicuranza d’edifecis dil Grischun, Gion Tenner sco era cun Stephan Holzer dalla Viafier Matterhorn Gottard ha cattau grond interess. Agl exercezi ein rodund 100 persunas dils pumpiers d’Andermatt e Sursassiala, digl Inspectorat da pumpiers dil Grischun, dils survetschs da salvament dalla Surselva e digl Uri sco era dallas polizias cantunalas dil Grischun e digl Uri separticipadas. Separticipai agl exercezi ein denton era collaboraturs dalla Viafier Matterhorn Gottard, commembers dall’armada dil Center da cumpetenza dil survetsch alpin sco era entginas persunas privatas. Tenor la polizia cantunala digl Uri vegn igl exercezi ussa valetaus ed eventualas migliurs vegnan recepidas els concepts d’engaschament.