Alla tscherca da menaschis purils

(anr/sr) Ferton ch’ils ins organiseschan bugen enzatgei pignet vulan ils auters enzatgei pli grond: Tenor l’Uniun purila svizra ch’enquera il mument hospitonts pil brunch d’emprem d’uost sa mintga famiglia ni gruppa purila organisar il solver d’emprem d’uost aschia sco ei plai e sco igl ei il meglier da realisar e dar damogn. «Il brunch ei in’occurrenza ideala per far reclama per atgnas creaziuns fatgas sil menaschi e per l’agricultura svizra», scriva l’Uniun purila svizra en in communicau als mieds da massa. «Envidei era vus las Svizras ed ils Svizers d’emprem d’uost sin vies menaschi per solver. Igl engaschi sepaga: Vus saveis presentar a moda optimala vos products e la purschida sin vies menaschi – e mussar con engaschi e conta pissiun che schaian davos tut quei», appellescha l’Uniun purila svizra. Forsa ch’ils hosps seregordien tier la proxima cumpra dils products e cumprien gest quels. Ei fidien alla derivonza e qualitad, vegnien sensibilisai e cumprien aschia eventualmein en general dapli creaziuns fatgas sez e products regiunals.

Solvers gronds e pigns

Il solver d’emprem d’uost tradiziunal po vegnir organisaus per 30 persunas en casa ni en ina camona, per 80 persunas en curtgin ni era per 500 persunas en tenda ni en stalla gronda. Nua e cons hosps ch’han plaz sin in menaschi dependa tut dallas pusseivladads e dallas ideas individualas dils hospitonts. «Enzatgei ei denton clar: La damonda ei gronda e senza avunda menaschis che porschan in solver sa il brunch d’emprem d’uost sil bein puril buca nezegiar siu potenzial», scriva l’Uniun purila svizra. Ei drova tut quels ch’han tochen ussa purschiu in solver e massa novas famiglias purilas engaschadas ed interessadas ch’ein promtas dad arver las portas da lur menaschi per retscheiver ils hosps a caschun dalla fiasta naziunala. Els vegnan susteni dall’Uniun purila svizra, dils responsabels dallas uniuns cantunalas pil brunch e da sponsurs e quei naven dall’entschatta tochen tiel di d’emprem d’uost. Ei dat agid en damondas da communicaziun, ils organisaturs san retrer material da sponsoring e reclama sco era agids da s’orientar e gliestas da controlla. Pils hospitonts ein quels survetschs gratuits. Sco mussament da stema dat ei era in pign engraziament per tuts che fan amogna in brunch e cun empau cletg san ei gudignar vacanzas ella valeta da 1500 francs.

Tgi che vul organisar in solver puril duei s’annunziar entochen sil pli tard ils 26 d’avrel tier: Schweizer Bauernverband, 1. August-Brunch 2019, Laurstrasse 10, 5201 Brugg, e-mail: info@brunch.ch ni www.brunch.ch/anbieter