BLS vul stritgar radund 170 plazzas

(rtr) La viafier BLS, Bern-Lötschberg-Simplon, vul stritgar radund 170 plazzas fin il 2023. Quai ha communitgà l’interpresa. I na duaja però betg dar dapli che 45 visadas. Il rest duaja succeder tras pensiunaments e fluctuaziuns natiralas. Er na duajan plazzas libras betg vegnir occupadas. 
Cunzunt pertutgads da la restructuraziun sajan funcziunaris da support e da management. Per ils pertutgads dettia in plan social, elavurà communablamain cun ils sindicats.