Dus donnas agl timung

DA GION NUTEGN STGIER / ANR

Igl cunsegl d’administraziun dalla Center da Sanadad Savognin SA ò eligia Christine Demarmels da Savognin scu nova directoura. Sia substituta davainta Sandra Luzio tgi è er da tgesa a Savognin. Las dus donnas on surpiglia gio siva digl 1. da november 2018 la direcziun operativa ad interim siva digls ambrogls perveia digl directour Gion Cola ed oters problems ainten la tgesa cun passa 100 ampluias. La schliaziun provisorica è sa cumprovada cun esser las dus donnas cumpetentas e versadas. Gion Cola, el è sa retratg digl post scu directour, chegl er or da muteivs da sanadad e siva dad esser sto pulit ainten la critica.

Gio blers onns amplueidas 
digl spital Surses

Christine Demarmels, la nova directoura, surpeglia la direcziun operativa e represchainta igl travagl anvers anaint 
ed anor. La responsabladad ò ella per 
igl persunal ainten la sparta betg medicinala.

Ella segna er per la contabilitad e Controlling tgi èn anc adegna sottamess ad ella. Sandra Luzio è scu manadra digl sarvetsch da tgira responsabla per igl antier camp da tgira.

Ultra da chegl surpeglia ella la tgira digl persunal medicinal e da tgira. Demarmels è amplueida gio 14 onns tar la Center da Sanadad Savognin SA. Avant tgi surpiglier la responsabladad per la contabilitad e Controlling ò ella mano la partiziun administraziun digls paztgaints/recepziun.

Siva dall’antschatta settember 2018 era ella er commembra dalla direcziun. Luzio lavoura gio siva digl 1. da settember 1995 ainten igl Center da Sanadad e siva digl 1. da favrer 2014 è ella er commembra dalla direcziun e magna igl sarvetsch da tgira.